Kryetarët e degëve të PD-së dhe të deleguarit e qendrës do të kenë dy muaj kohë në dispozicion për të mbledhur faktet mbi rezultatin e zgjedhjeve të 25 qershorit në zonat që mbulojnë, kryesisht duke u përqëndruar në manipulimin e votës.
Ky është një nga udhëzimet që kreu demokrat Lulzim Basha u ka dhënë drejtuesve të PD në bazë, të cilëve gjithashtu u ka kërkuar të verifikojnë anëtarësinë e partisë dhe të diskutojnë me çdo anëtar të saj mbi mënyrën sesi mund të ristrukturohet dhe organizohen strukturat.
Burime nga PD bëjnë të ditur se gjithashtu kreu demokrat ka kërkuar një analizë qendër për qendër votimi të rezultatit, krahasuar kjo me zgjedhjet e 2013-ës për të parë diferencat dhe shkaqet që çuan në një humbje të thellë.
Në këtë kuadër, sërisht vëmendja do të përqëndrohet në faktin sepse qytetarët nuk dolën të shprehin vullnetin e tyre me votë, apo pse mund të ketë pasur rrjedhje të saj.
Në takimin me drejtuesit e degëve, kreu demokrat nuk ka folur konkretisht për përgjegjësinë e drejtuesve të degëve, duke dhënë sinjalin e analiza që do të bëhet në rradhët e demokratëve do të përqëndrohet në faktorët e jashtëm që çuan në humbjen më të thellë të kësaj partie.
Pak a shumë e njëjta skemë u ndoq edhe në zgjedhjet vendore të 2015-ës, ku humbja iu faturua tërësisht manipulimit të votës dhe jo defekteve që mund të kenë shfaqur në fushatë kandidatët apo strukturat e partisë më të madhe të opozitës. /tesheshi.com/
