Nga Mark Brunga
Një figurë e madhe e politikës dhe diplomacisë amerikane që lidhet ngushtësisht për mirë me fatin e shqiptarëve, sidomos atyre të Kosovës, është dhe Richard Hollbruke. Ish-negociator në kushte lufte, njeriu që për herë të parë u takua me krerë të UÇK-së në Junik, diplomat i angazhuar kah të drejtat e kosovarëve si një prej zërave më potentë të Uashingtonit në kohën e luftës së Kosovës, ai gëzon respekt e vlerësim maksimal ndër kosovarë.
Dhe ngase nuk jeton më, figura e tij dhe kujtimi i tij është nderuar me variantin e njohur, atë të derdhjes në bronx.
Së fundi, busti i tij u vendos në Fier, atje ku jeton një komunitet i madh kosovarësh. Por interesant është fakti se i njëjti bust është vendosur një vit më parë dhe në qytetin e Vitisë në Kosovë. Dhe tashmë atë kërkojnë ta kenë dhe qytete të tjera.
Busti është vepër e skulptorit durrsak, Idriz Balani. Dhe kur e ka patur ende në dorë, ende në studio, pa e çuar në Viti, atij i ka ndodhur një episod i këndshëm me ca shtetas kosovarë që rastësisht i futen në studio. Kur ia shohin punën, ata e quajnë skulptorin “djalë të tyre”, pikërisht nga fakti se po punonte Hollbrukun për ta çuar në sheshin e një prej qyteteve kosovare.
Kosovarët që kishin ardhur për pushime në plazhin e Durrësit e panë rastësisht në momentin e përgatitjes për transport drejt fonderisë. Qazim Jakupaj, nxjerr nga xhepi dhe vendos në xhaketë një fletë-dëshmie të dëshmorit Fitim Jakupaj, të vëllait, rënë më 1998 në betejën e Negrovacit. “Ky burrë, thotë më pas duke parë bustin e heroit, qe ndër ata që na shpëtuan nga zhdukja. E përshëndes me dëshirë edhe Klintonin dhe të gjithë ata që na kanë ndihmuar. Ju a di për nder të gjithë atyre që na shpëtuan nga gjakpirësit”.
Ndërsa Hajzer Bashota, mësuesi 75-vjeçar nga fshati Cerovik i Klinës, thotë: “Richard Hollbruk ka qënë dorë e jona, krahu ynë në konfliktin shekullor me serbët…”
Autori i bustit të sapopërfunduar, Idriz Balani, u tregon se kishte shumë kohë që po punonte për të. Ai u thotë se busti ka nisur të bëhet me nismën e Misionit Diplomatik në Shqipëri, fondacionit “Hollbruk” të krijuar para disa viteve në Tiranë kur diplomati i madh ishte ende gjallë si dhe të 2 shoqatave të tjera kosovare me mbështetje të Vitisë, vend ku më pas është vendosur.
E tashmë, veç Vitisë, Hollbruku ka një “shtëpi” dhe në Fier, por nuk rreshtin kërkesat nga tan Kosova për ta patur mysafir të përhershëm dhe në qytetet e tyre. /tesheshi.com/
