Kancelari gjerman Olaf Scholz mbrojti udhëtimin e tij të diskutueshëm në Kinë të shtunën, duke thënë se “ia vlente” për shkak të qëndrimit të përbashkët të dy vendeve për përdorimin e armëve bërthamore në Ukrainë.
Në një mbledhje të socialdemokratëve gjermanë në Berlin, një ditë pas një vizite 12-orëshe në Pekin, Scholz shprehu kënaqësinë e tij për bisedën me presidentin kinez Xi Jinping, i cili, siç ai, kundërshton përshkallëzimin bërthamor në luftën në Ukrainë.
“Unë mendoj se në dritën e debatit nëse ky udhëtim ishte i nevojshëm, fakti që qeveria kineze, presidenti (Xi) dhe unë ishim në gjendje të biem dakord që asnjë armë bërthamore nuk duhet të përdoret në atë luftë, edhe vetëm kjo e bëri udhëtimin të vlefshëm”, tha ai.
Pas takimit me Xi Jinping të premten në Pekin, Scholz tha se “lufta në Ukrainë po krijon një situatë të rrezikshme për të gjithë botën”.
“Prandaj është shumë e rëndësishme për mua të theksoj, të deklaroj qartë se përshkallëzimi i luftës në formën e përdorimit të armëve bërthamore taktike është i përjashtuar dhe jam shumë i kënaqur që të paktën është arritur një marrëveshje për këtë çështje”, shtoi ai.
Deklarata kineze përmend gjithashtu kundërshtimin e Pekinit ndaj përdorimit të armëve bërthamore.
Shtëpia e Bardhë tha këtë javë se diskutimet e përsëritura nga liderët rusë rreth përdorimit të mundshëm të armëve bërthamore në Ukrainë nxitën frikën e Uashingtonit se kjo mund të realizohej.
Ministria e Jashtme ruse u përgjigj se “përparësia absolute” në botë duhet të jetë parandalimi i konfliktit midis fuqive bërthamore, “në situatën aktuale të vështirë dhe të turbullt”.
Scholz ishte lideri i parë i G7 që vizitoi Kinën që nga fillimi i pandemisë Covid. Ai në udhëtim shoqërohej nga një grup i madh sipërmarrësish.
Scholz has landed in Beijing pic.twitter.com/iJtveToBIQ
— Richard Walker (@rbsw) November 4, 2022
Pas udhëtimit, kancelari u vu nën kritika në Gjermani dhe mes partnerëve evropianë për varësinë ekonomike në rritje të Berlinit nga Pekini dhe për shkak se ajo erdhi menjëherë pas shtrëngimit të kontrollit nga Xi mbi qeverinë kineze muajin e kaluar. /tesheshi.com/
