Ministrat e qeverisë së Kosovës nuk do të udhëtojnë më jashtë vendit pa e njoftuar paraprakisht kryeministrin Ramush Haradinaj, në të kundërtën pritet të ndërmerren masa ndaj tyre.
Kjo u bë e ditur të martën në mbledhjen e qeverisë në të cilën u miratua urdhri për obligimin e ministrave, për zbatimin e udhëzimit administrativ lidhur me udhëtimet zyrtare.
Kryeministri Haradinaj tha njoftimi duhet të përmbajë qëllimin e udhëtimit, destinacionit dhe numrin e atyre që udhëtojnë dhe ta njoftojnë qeverinë.
“Për udhëtimet që bien ndesh me këtë urdhër ka masa. Urdhri hyn në fuqi në ditën e nënshkrimit. Ne kemi përgjegjësi politike dhe morale vendosjen e një rregulli të tillë është në nderin tonë dhe raportimi është në përgjegjësinë tuaj dhe kushdo që do të udhëtojë le të raportojë vizitën përpara”, tha Haradinaj.
Ai shtoi se do të vendos një pikë për raportimet e ministrave për vizitë jashtë vendit për të tregu ku kanë qenë, ku kanë qëndruar dhe sa staf kanë marrë me vete.
“Nëse nuk e bëni, ne do të kërkojmë masa tjera apo hetim, me marrë vesh çka ka ndodhur në këto vizita. Çdo vizitë që bëhet me para të popullit dhe konsiderohet si zyrtare, duam ta dimë përpara dhe duam raport pastaj lidhur me vizitën. Ju kisha lut të vendosni rend, sepse çdo muaj duam raport edhe prej ministrive”, deklaroi Haradinaj. /tesheshi.com/
