Liderët e vendeve anëtare të Bashkimit Evropian përshëndetën marrëveshjen e arritur nga Serbia dhe Kosova më 18 mars në Ohër.
Në konkluzionet e miratuara në fund të ditës së parë të samitit në Bruksel dhe të publikuara në faqen e internetit të Bashkimit Evropian, liderët e vendeve anëtare u bëjnë thirrje të dyja palëve që “të zbatojnë detyrimet e tyre në mënyrë të shpejtë dhe në mirëbesim”.
Paraprakisht, shefi i diplomacisë evropiane, Josep Borrell, e informoi Këshillin Evropian për rezultatet e takimit në Ohër.
“Marrëveshja duhet të zbatohet”
Para fillimit të samitit dyditor të BE-së, Borrell tha se çdo përpjekje për të vënë në pikëpyetje marrëveshjen e Ohrit ndërmjet Kosovës dhe Serbisë është e kotë, se ajo duhet të zbatohet dhe se nuk ka vend për zgjedhje.
Ai u tha gazetarëve se është një tërësi që duhet zbatuar dhe se BE-ja do të monitorojë nga afër se kush e zbaton dhe kush jo.
Më 18 mars, në Ohër u mbajt një takim i nivelit të lartë në kuadër të dialogut Kosovë-Serbi, në të cilin morën pjesë Përfaqësuesi i Lartë i BE-së Josep Borrell, Përfaqësuesi Special i BE-së për Dialog Miroslav Lajçak, presidenti serb Aleksandar Vuçiç dhe kryeministri i Kosovës Albin Kurti. Në takim u arrit marrëveshje për zbatimin e marrëveshjes për normalizimin e marrëdhënieve ndërmjet Kosovës dhe Serbisë. /tesheshil.com/
