Në një intervistë për gazetën el-Arabi el-Xhedid, kreu i byrosë politike të Hamasit, Halid Meshali, konfirmoi se bisedimet me Izraelin po shkojnë drejt një armëpushimi, e se kontaktet duken pozitive, edhe pse nuk ka ende një marrëveshje.
Ka qenë presidenti palestinez, Mahmud Abbas, ai që ka deklaruar më herët se Izraeli dhe Hamasi po zhvillojnë prej muajsh bisedime të fshehta në një vend afrikan, duke aluduar për Egjiptin.
Zyra e kryeministrit izraelit mohoi gjithçka në fillim të javës, duke deklaruar prerë se, “nuk ka takime me Hamasin, as nuk ka kontakte, të drejtpërdrejta apo të tërthorta, me organizatën.”
Vetë Meshali flet për të kundërtën, duke u shprehur për bisedime pozitive, edhe pse nuk është arritur akoma në një marrëveshje.
Po ashtu, Halid Meshali bëri të ditur se në bisedimet mes Izraelit dhe Hamasit po merr pjesë dhe Tony Blair.
“Për sa kohë do të ketë pushtim dhe ngulime, do të ketë rezistencë legjitime, por nuk po kërkojmë luftë,” kanë qenë fjalët e udhëheqësit të Hamasit.
Në prioritetet e Hamasit janë rindërtimi i Rripit të Gazës, heqja e rrethimit të Gazës, zgjidhja e krizës së papunësisë dhe lejimi i ndërtimit të një porti detar dhe të një aeroporti, si dhe rregullimi i infrastrukturës së furnizimit me ujë dhe energji.
Sipas tij, Hamasi është i hapur ndaj çdo propozimi serioz, por jo në kurriz të parimeve dhe interesave kombëtare palestineze.
Më tej ai e quajti të patolerueshme gjendjen e banorëve të Gazës, të cilët jetojnë nën një bllokadë të egër. Për të, lëvizja e armatosur nuk ka për t’i ulur armët gjersa territoret palestineze të jenë të pushtuara nga izraelitët. /tesheshi.com/
