Halid Meshali, udhëheqësi i Hamasit, e bashkë me të dhe zyrtarë të tjerë të lartë të organizatës palestineze, u takuan sot në Arabinë Saudite me mbretin saudit, Selman bin Abdulaziz.
Në takimin e parë të këtij niveli pas disa viteve morën pjesë dhe princi sauditi kurorës e ministri i Mbrojtjes. Në bisedën mes palëve u diskutua për situatën politike në rajon dhe për unitetin palestinez.
Takimi është parë si një shenjë afrimi mes Hamasit dhe mbretërisë saudite. Në fakt, marrëdhëniet mes Hamasit dhe Arabisë Saudite janë përmirësuar qëkur mbreti Selman u ul në fron në janar të këtij viti.
Udhëheqësi i Hamasit dhe mbreti saudit e falën sot së bashku dhe namazin e Fitër Bajramit.
Kjo është hera e parë që Halid Meshali e viziton Arabinë Saudite gjatë mbretërimit të Selmanit. Vizita e tij e fundit ka qenë në qershor të 2012-ës.
Ky takim kryhet dy ditë pasi fuqitë botërore nënshkruan një marrëveshje me Iranin, dhe lë të kuptohet se sauditët dhe Hamasi janë në kërkim të marrëdhënieve më të ngushta në një përpjekje për t’iu kundërvënë rritjes së ndikimit iranian në rajon.
Irani ka qenë për një kohë të gjatë një mbështetës i qeverisësve të Rripit të Gazës, por marrëdhëniet kanë njohur një krisje të thellë me refuzimin e Hamasit për të qenë në krah të presidentit sirian, Beshar Esadit, aleatit të ngushtë të iranianëve.
Meshali është një përkrahës i patundur i Arabisë Saudite, dhe ka shprehur pëlqimin për betejën e kryesuar nga Arabia Saudite kundër rebelëve shiitë në Jemen. /tesheshi.com/
