Uashingtoni i kërkon Izraelit të kthejë “në shina” procesin e paqes me palestinezët, një ditë pasi Tel Avivi miratoi ndërtimin e shtëpive të reja në Bregun Perëndimor. Departamenti i Shtetit tha se zgjerimi i vendbanimeve kërcënon zgjidhjen përmes krijimit të dy shteteve dhe vuri në dyshim angazhimin e Izraelit për të gjetur një zgjidhje për krizën.
Zëdhënësi i Departamentit Amerikan të Shtetit, Mark Toner shprehu shqetësimin për lëvizjet më të fundit. “ Ia kemi bërë të qartë edhe liderëve izraelitë, publikisht, por edhe privatisht”, tha ai.
“Ne kundërshtojmë avancimin e ndërtimeve në Bregun Perëndimor dhe Jeruzalemin lindor e apelojmë për ndaljen e veprimeve që vënë në rrezik procesin e krijimit të dy shteteve”, theksoi ai, duke shtuar se këto vendbanime konsiderohen të paligjshme.
Deklaratat vijnë në një kohë që Tel Avivi miratoi ndërtimin e 300 shtëpive të reja në vendbanimin Beit El si dhe planifikimin e gati 500 të tjerave në një numër vendbanimesh në Jeruzalemin lindor.
Ligji ndërkombëtar i konsideron Jeruzalemin lindor dhe Bregun Perëndimor si territore të pushtuara dhe quan të paligjshme ndërtimet izraelite në këto toka. /tesheshi.com/
