Uashingtoni ka sfiduar Kinën, pavarësisht paralajmërimeve të kësaj të fundit e ka nisur operacionet në ujërat e detit të Kinës Jugore. Aeroplanmbajtësja amerikane “USS Carl Vinson” njoftohet se po patrullon në të ashtuquajturat operacione rutinë, shoqëruar nga një flotë mbështetëse avionësh luftarakë.
Dislokimi i aeroplanmbajtëses në pjesën e diskutueshme të territorit vjen disa ditë pasi Ministria e Jashtme e Kinës paralajmëroi Uashingtonin kundër sfidimit të sovranitetit të Pekinit mbi këtë rajon.
Kina pretendon sovranitet mbi një sërë ishujsh dhe shkëmbinjsh nënujorë në këtë zonë, sikurse pretendohet edhe nga disa shtete të tjera të rajonit të Azisë Juglindore.
Pekini gjatë viteve të fundit ka ndërtuar ishuj artificialë me pista zbritjeje, apo aeroporte të vegjël, në këto pjesë të detit të Kinës Jugore.
Sekretari amerikan i Mbrojtjes, James Mattis tha gjatë një udhëtimi të kohëve të fundit në Japoni se, administrata e Trumpit nuk ka parë asnjë nevojë “për lëvizje dramatike ushtarake” në këtë rajon të diskutueshëm. Deklarata e tij duket të hedhë poshtë komentet e bëra nga Sekretari amerikan i Shtetit, Rex Tillerson, i cili u tha senatorëve gjatë një seance informimi se Kina nuk duhet lejuar të mbërrijë në ishujt e diskutueshëm. /tesheshi.com/
