Ambasada e SHBA në Serbi përsëriti se ishte “e shqetësuar se Serbia po blen pajisje ushtarake ruse” dhe i kërkoi Beogradit të braktiste transaksionet që mund të shkaktonin sanksione.
“Ne u bëjmë thirrje të gjithë aleatëve dhe partnerëve tanë që të heqin dorë nga transaksionet me Rusinë që rrezikojnë sanksione përmes Aktit të Sanksioneve (CAATSA). Ne kemi shprehur vazhdimisht shqetësim për blerjen e pajisjeve ushtarake ruse në Serbi, përfshirë blerjen e planifikuar të sistemit Pancir, me zyrtarë të lartë qeveritarë”, thuhet në një deklaratë.
Ambasada shkruan se SHBA dhe Rusia kanë “vizione shumë të ndryshme për të ardhmen e Ballkanit Perëndimor”.
Nga njëra anë, “Uashingtoni mbështet fuqimisht rrugën evropiane të Serbisë dhe qëllimin e saj të deklaruar të anëtarësimit në BE”, dhe nga ana tjetër, “Moska kundërshton në mënyrë aktive integrimin perëndimor të rajonit dhe kërkon të parandalojë tensionet etnike, të margjinalizojë ndikimin e SHBA dhe BE, si dhe ngadalësojë ose parandalojë vendet e Ballkanit Perëndimor që të ndjekin orientimin e tyre të pavarur”, shkruan Ambasada e SHBA në Serbi.
Më 4 mars, Presidenti serb Aleksandar Vuçiç konfirmoi se sistemi raketor që Serbia kishte blerë nga Rusia ishte përfunduar me dorëzimin e katërt të pjesëve të sistemit Pancir të Rusisë dhe deklaron se sistemi është i destinuar për mbrojtje.
Sanksionet e mundshme ndaj Serbisë u përmendën për herë të parë në nëntor 2019 nga Përfaqësuesi Special i SHBA për Ballkanin Perëndimor, Matthew Palmer.
Serbia është ende në pritje të dorëzimit të tankeve T-72 dhe një pjesë të automjeteve të blinduara “BRDM-2”, të cilat i mori si dhurim nga Rusia, si dhe katër avionët luftarakë ruse MiG-29 nga Bjellorusia, të cilat janë duke u riparuar. /tesheshi.com/
