Siç njofton Zëri i Amerikës, Departamenti i Shtetit i ka ndaluar hyrjen në Shtetet e Bashkuara, ish-Kryeprokurorit Adriatik Llalla, duke përfshirë dhe familjen e tij, gruan Ardjana, vajzën Eni dhe një fëmije tjetër.
“Vendimi, i bërë publik të mërkurën, thekson se Sekretari i Shtetit Rex Tillerson, e miratoi masën e ndalimit për shkak të përfshirjes së ish zyrtarit shqiptar në raste të mëdha korrupsioni”, thuhet në lajmin e VOA-s.
Vendimi vjen disa ditë pas një përbetimi amerikan, shprehur me gjuhën e ambasadorit Lu, se Llalla nuk do mund t’i ikë vetingut. Kjo pasi ish-Kryeprokurori, ka bërë kërkesë për të mos qenë më më gjyqësor, pra për të mos kaluar në proces verifikimi.
Nga ana tjetër, vendim amerikan ndaj ish-Prokurorit është dhe një shprehje unifikimi mes Administratës Trump dhe Ambasadës Amerikane në Tiranë, në lidhje me qëndrimet e ambasadorit Lu, si ndaj reformës në drejtësi e si personalisht ndaj Llallës, me të cilin ka patur përplasje të paprecedenta, të gjithë brenda atmosferës së reformës apo luftës ndaj pandëshkueshmërisë në nivelet e larta të politikës. /tesheshi.com/
