Ambasada Amerikane në Kosovë ka bërë një reagim të pazakontë, duke vënë me “shpatulla për muri” qeverinë Haradinaj, jo për taksën a ndonjë çështje të mprehtë politike, por për emërimet e njerëzve në poste shtetërore.
“Shtetet e Bashkuara të Amerikës mbesin thellësisht të shqetësuara nga veprimi i qeverisë së Kosovës për emërimin e individëve të pakualifikuar në pozita të larta qeveritare – përfshirë edhe individë të dënuar për krime lufte, individë nën aktakuzë aktive për krime të rënda dhe të dyshuar për keqpërdorim të rëndë të pozitës”, thuhet në deklaratë. Emra konkretë nuk ka, por nuk është e vështirë të imagjinohet se bëhet fjalë për një sosh që kjo ambasadë hapur ka shfaqur mospajtim – Sylejman Selimin, ish-një ndër komandantët e UÇK-së që u dënua për krime lufte, e që tashmë është emëruar ambasador në Tiranë.
“Individët e pakualifikuar, të cilët janë dënuar nga drejtësia apo janë duke u ndjekur në mënyrë aktive për krime të rënda, si dhe ata që kanë shfaqur gatishmëri për të vepruar, të sigurtë se nuk do të dënohen, dhe kanë keqpërdorur autoritetin e tyre, nuk kanë vend në pozitë zyrtare”, thuhet në reagim.
“Nominimi i këtyre individëve të pakualifikuar minon besimin e publikut që Kosova po përpiqet ta ndërtojë, e privon vendin nga mundësia për të pasur individë kompetentë, me nam dhe më se të kualifikuar për të kryer punën në qeveri dhe i çnderon viktimat e krimeve të kaluara të këtyre individëve”, vijon deklarata, ku në një pikë përligjet ky qëndrim me këtë arsyetim.
“Natyrisht, individët duhet të kenë mundësi për të rindërtuar jetën e tyre pas këtyre shkeljeve të të kaluarës: ashtu siç ka thënë Bryan Stevenson, avokat dhe humanitar amerikan: ‘Secili prej nesh është më shumë se gjëja më e keqe që e kemi bërë ndonjëherë’. Por, madje edhe përderisa historia rikujton kontributet pozitive të individëve, si dhe dështimet e tyre, disa sjellje do të duhej të çkualifikonin përjetësisht një individ nga pozita zyrtare: përfshirja në krime të rënda do të duhej të ngrinte shqetësim për përshtatshmërinë e një personi që ndonjëherë të mbajë një pozitë të tillë”, thuhet ndër të tjera në deklaratë. /tesheshi.com/
