The Washington Post e ka renditur Shqipërinë mes nëntë destinacioneve të mirënjohura të Mesdheut.
Duke e krahasuar atë me Mikonosin fqinj, ajo i fton turistët e huaj të provojnë eksperiencën unike përgjatë bregdetit shqiptar me plazhe të kristalta, qytete antike, dhe male perfekte për sporte natyrore.
Në vend të Mikonosit, vizitoni Shqipërinë
Greqia renditet e para për turistët amerikanë këtë verë dhe ministri grek i Turizmit, Vasilis Kikilias ka parashikuar 10 deri në 20 % më shumë vizitorë në vend këtë vit se sa në 2022.
Si fillim, ishulli grek i Mikonosit ishte destinacioni kryesor ndërkombëtar në trend i “Airbnb” për përdoruesit amerikanë.
Për një alternativë me ujë të pastër kristal dhe çmime të përballueshme, provoni fqinjin verior të Greqisë, Shqipërinë.
Aty do të gjeni plazhe mesdhetare përgjatë Rivierës Shqiptare, dhe në brendësi, malet janë idilike për ecje, çiklizëm dhe qytete antike.
Në tre vitet që kur u shfaq koncepti i “udhëtimit hakmarrës”, etja jonë për arratisje ende nuk është shuar. Ekspertët e industrisë parashikojnë që vera e vitit 2023 të jetë më e ngarkuara në aeroporte ndër dekada.
“Kjo, pavarësisht kostove dukshëm më të larta”, tha James Ferrara, bashkëthemelues dhe president i “InteleTravel”.
“Ne as nuk i referohemi kësaj si një kërkesë e ndrydhur, kjo është normalja e re, një psikikë e re… që udhëtimi tani është më i rëndësishëm se pothuajse çdo gjë tjetër”, tha ai.
“Ne e dimë se njerëzit do të udhëtojnë me grupe, por ku do të shkojnë? Mbeten disa tendenca, si tërheqja jonë për plazhet dhe natyrën e mrekullueshme”, tha Ferrara.
Jen Moyse, zëvendëspresidente në aplikacionin e udhëtimit “TripIt”, tha se klientët e kompanisë së tyre po rezervonin pushime në Denver, San Diego, Orlando, Anchorage dhe Cancún, Meksikë.
“Shumë njerëz duan të vizitojnë qytetet e mëdha gjithashtu”, tha Moyse, duke renditur metropolet kryesore të Çikagos, Bostonit, Nju Jorkut dhe Las Vegasit.
“Nëse do të udhëtoni në muajin qershor dhe korrik, do të shihni turma të mëdha në qytetet evropiane dhe aziatike si… Londër, Paris, Romë, Tokio dhe ndoshta Seul”, tha Hayley Berg, ekonomiste për aplikacionin e rezervimit të udhëtimeve “Hopper”.
Nëse dëshironi të shmangni përplasjet me këto turma, merrni parasysh alternativat tona. /atsh/
