Forcat zjarrfikëse në Vlorë, edhe pse punuan pa pushim dhe e vendosën nën kontroll zjarrin e fuqishëm në pyllin e Poros, do të duhet t’ia nisin punës nga e para. Mesditën e kësaj të diele mësohet se flakët janë riaktivizuar për shkak të erës, duke vazhduar të djegin me mijëra pisha në zonë.
Forcat zjarrfikëse thanë për mediat lokale në Vlorë se presin një situatë të re emergjence, pasi për shkak të erës, flakët po përhapen dhe mund të dalin sërish jashtë kontrollit. Në ndihmë kanë ardhur edhe forcat e policies së rendit, asaj bashkiake dhe punonjës të Ndërmarrjes Pyjore.
Gjatë natës, ishte bërë e mundur që me ndihmën e helikopterëve nga ajri, të izoloheshin vatrat e zjarrit, e më pas do të punohej për shuarjen e plotë të tyre. Autoritetet e bashkisë së Vlorës që ndjekin nga afër situatën thonë se bëhet fjalë për një zjarrvënie të qëllimshme.
Nga zjarri i përmasave të mëdha janë djegur 3 vatra, sipërfaqe pyjore me shkurre, kullotë dhe pyje. Më herët, era e fortë ka bërë të mundur përhapjen me shpejtësi të zjarrit duke u afruar drejt pyjeve të Delisufit dhe Zvërnecit. Policia u bëri thirrje qytetarëve që banojnë pranë kësaj zone, të marrin masa për t’u larguar nga ato banesa të cilat rrezikohen nga flakët. /tesheshi.com/
