Nga Mensur Krasniqi
Jo “Republika e Kosovës” por “një organizatë qytetare” – kështu e quajti me tallje shtetin e Kosovës, gazetari serb i televizionit shqiptar Alsat-M në Maqedoni.
Nikola Zdravkoviç, i punësuar në programin e gjuhës maqedonase, gjegjësisht i emisionit “360 shkallë”, ka shprehur krenarinë e tij për fitoren e Serbisë në basketboll ndaj Greqisë, dhe njëkohësisht ka publikuar edhe fitoren e Maqedonisë ndaj asaj që ai me ironi e quan “një organizatë qytetare” dhe jo Kosovës.
Ky status i tij, ka nxitur reagime të ndryshme nga opinionistë dhe aktivistë qytetarë në Maqedoni. Ata përveçse kujtojnë gazetarin serb për vlerën e një shteti si Kosova, kërkojnë nga televizioni Alsat-M që të distancohet, ose së paku të prononcohet lidhur me qëndrimin e Nikolla Zdravkoviç.
“Për gazetarin e Alsat M Kosova na qenka “një organizatë qytetare”.
Alsat – M duhet o të distancohet o të merr masa ndaj nëpunësit të tij. Kosova ka qenë gardiani numër një i qenies shqiptare për gati se një shekull. Nën çdo pëllambë të saj qëndron gjaku e djersa e çdo shqiptari. -Mosdistancimi i televizionit është baraz me pajtim me atë konstatim!”, ka shkruar në facebook Ubejd Jashari, opinionist dhe aktivist qytetar.
“Nikola Zdravkoviç, dëgjo këtu fashist! Për atë copë shtet, që të lirohet nga fashistët si ju, është derdhur gjak! Janë vrarë mbi 20.000 persona dhe më shumë të lënduar. Mbi 1 milion njerëz kanë qenë të detyruar që ti lëshojnë shtëpitë e tyre. Dhe thuajse pas 20 viteve ende ka njerëz të vdekur që kufoma e tyre nuk është gjetur! E tani të dalësh ti i “mençur” dhe të thuash që paska qenë “organizatë qytetarësh”, unë mundem të dëshiroj që e gjithë kjo “organizatë qytetarësh” të shëtisin lakuriq në shtëpinë tënde!!! Fashist, ai shtet ka emër! Quhet Republika e Kosovës, deshte ti apo jo!!! Alsat-M, për të treguar pak rrespekt ndaj shikuesve tuaj të cilët në një përqindje të madhe i keni shqiptarë, dhe duke e patur parasyshë se programi juaj ndiqet edhe në Kosovë, do të ishte e udhës që ta përkashtoni këtë mbeturinë fashiste nga televizioni juaj!!”, ka shkruar Bekim Berisha, aktivist qytetar në rrjetin social facebook.
Ndonëse kanë kaluar dy ditë nga ofendimi i gazetarit serb në drejtim të shtetit kosovar, Alsat-M ende nuk ka dalë me qëndrim zyrtar lidhur me këtë.
Portali tesheshi.com ka bërë përpjekje që ta kontaktojë udhëheqësin e produksionit për emisionin “360 shkallë”, Vasko Popetrevskin, por që nuk ishte i kapshëm në lidhje telefonike.
Kujtojmë se para disa vitesh, televizioni Alsat-M, duke qenë pikërisht kundër qasjes nacionaliste dhe ofenduese të gazetarit të njohur Vasko Eftov, të njëjtin e shkarkoi nga puna për shkak të fyerjeve të bëra ndaj figurës së heroit kombëtar, Adem Jashari. /tesheshi.com/
