Kandidati hungarez për Komisioner i Zgjerimit të BE-së, Laszlo Trocsanyi tha se ishte i mërzitur nga vendimi i Komisionit për Çështjet Ligjore të Parlamentit Evropian, i cili konfirmoi se ai nuk mund të emërohej në këtë post për shkak të një konflikti interesi të pretenduar.
“Padrejtësia e madhe, mungesa e transparencës, shkelja e qartë dhe e qëllimshme e sundimit të ligjit dhe procedurave dhe mosrespektimi i parimeve themelore të demokracisë më kujtojnë kohën kur mendova se kishte mbaruar”, tha Trocsanyi në një deklaratë të postuar në llogarinë e tij në Tëitter.
Trocsanyi theksoi se ai nuk mund ta kuptonte këtë vendim nga këndvështrimi profesional ose personal.
“Vendimi në fjalë është një seri gënjeshtrash, konkluzionesh të gabuara dhe tendencioze”, tha ai, duke theksuar se si avokat ai nuk kishte zgjidhje tjetër, por të kërkonte drejtësi nga një gjykatë kompetente.
Zëdhënësi i Parlamentit Evropian, Jaume Duch Guillot tha më herët se Komiteti Gjyqësor i Parlamentit Evropian konfirmoi që Laszlo Trocsanyi dhe Rovana Plumb “nuk mund të emërohen si Komisionerë, në përputhje me Traktatet dhe Kodin e Sjelljes”.
Ai e shkruajti këtë në Tëitterin e tij pas një mbledhjeje të Bordit.
Ai tha se Parlamenti Evropian tani do t’i kërkojë kreut të KE-së, Ursula von der Leyen të thotë se cilat hapa të mëtejshëm synon të ndërmarrë. /tesheshi.com/
