Ish-nr. 2 i Rendit në katërvjetëshin “Tahiri”, Elona Gjebrea, ka mbrojtur veten me anë të një statusi në FB, një lloj apologjie e pafajësisë, por pa u dhënë përgjigje pyetjeve të ardhura nga deputetja demokrate Dhurata Çupi.
Ditët e fundit, Gjebrea është “futur” dhe ajo në dosjen “Tahiri”, pasi konstatimit se ka udhëtuar me Audin problematik të ish-eprorit të saj, pronë e ndarë përgjysëm mes Tahirit dhe Habilajve.
Ja ç’shkruan znj. Gjebrea:
Sqarim:
Asgjë të paligjshme apo të pamoralshme nuk ka në punën time 4-vjeçare si Zv.Ministre e Punëve të Brendshme edhe sot si deputete e Kuvendit të Shqipërisë. Por dhe gjate gjithe jetes dhe karrieres time.
Miq dhe dashamirës, votues të Njësisë bashkiake nr.1 në Tiranë, bashkëpunëtorë dhe mbështetës të Partisë Socialiste, në respekt të ndjeshmërisë së krijuar për shkak të sulmeve të fundit që më janë bërë nga opozita e Lulzim Bashes, e ndiej për detyrë morale t’ju siguroj se i gjithë aktiviteti im institucional, ashtu sikurse edhe jeta personale e familjare kanë qene dhe mbeten të bazuara te përgjegjshmëria ligjore dhe morale.
Sulmet e opozitës, janë një përpjekje e dështuar për të njollosur figurën time, duke hedhur në tregun mediatik mashtrime dhe të pavërteta.
Sigurisht ne momentin e duhur keta baltoses e shpifes qe guxojne te hedhin balte e shpifje mbi figuren time do te perballen sipas ligjit.
Ashtu siç e kam shprehur publikisht, kam qenë dhe mbetem e hapur për t’u hetuar nga të gjitha organet ligjzbatuese.
Deri më sot asnjë thirrje nuk më ka ardhur nga organi i prokurorisë, siç është pretenduar nga disa media.
Duke falenderuar të gjithë miqtë dhe dashamirësit që më kanë shkruar apo telefonuar këto ditë duke më shprehur mbështetjen e tyre, edhe një herë dua t’i garantoj për pastërtinë e figures time.
Ja pyetjet që i drejtoheshin nga kolegia rivale, që kanë si indicie uudhëtimin e saj me Audin A8 të Saimir Tahirit, bashkë me këtë të fundit, ndërkohë që auromjeti iu është dhënë nga Habilajt në Greqi, për t’u kthyer që andej drejt Shqipërisë, siç është vërtetuar nga sistemi TIMS.
- Pse udhëtoi privatisht për në Greqi?
- Pse në këto udhëtime nuk mori makinën dhe shoferin e saj?
- Pse nuk udhëtoi qoftë edhe me makinën e saj private?
- Pse zgjodhi të udhëtojë me makinën e Habilajve?
Zonja Gjebrea duhet gjithashtu t’i përgjigjet pyetjes:
- A është takuar ndonjëherë me Habilajt?
- Nëse po, përse është takuar?
Zonja Gjebrea duhet gjithashtu të sqarojë opinionin publik:
- Si Koordinatore Kombëtare Kundër Trafikimit a ka qenë ajo e informuar për trafikun masiv të drogës dhe të armëve nga Shqipëria në Itali dhe Greqi?
- Cilët drejtues të lartë të shtetit ka informuar?
- Çfarë masash ka marrë ajo për këtë gjë?
Si deputete e Kuvendit të Shqipërisë ajo sot duhet të përgjigjet edhe për një pyetje tjetër:
- A ndjen kjo përfaqësuese e popullit ndonjë përgjegjësi morale dhe politike për lulëzimin e krimit dhe të drogës në Shqipëri gjatë katër viteve që ajo ishte numër 2 i Ministrisë së Brendshme?
Pra, siç shihet, znj. ish-zv/ministre, ka gjetur tjetër formë shfajësimi të vetvetes, duke injoruar pyetjet konkrete që i dërgoheshi. /tesheshi.com/
