Nga Bashkim Kastrati
Inspektori i veterinës në Komunën e Pejës, Arbër Taraku është larguar nga puna, pasi më 16 janar të këtij viti u kishte bërë thirrje qytetarëve që të kenë kujdes në përdorimin e produkteve të importuara nga Serbia.
Në vendimin e largimit nga puna thuhet se inspektori i veterinës, Arbër Taraku është përjashtuar për shkak të “tejkalimit i autorizimit-kompetencave të veta duke publikuar në Web faqen e Facebookut, duke iu bërë thirrje qytetarëve të Pejës dhe me gjerë, kinse kujdes nga produktet ushqimore që vijnë nga Serbia”.
Në një njoftim të publikuar në Facebook, Taraku kishte thënë se produktet serbe nuk kontrollohen, pasi laboratorët në vendin tonë nuk kanë kushte për kontroll të rregullt të produkteve.
Dyshimi rritet edhe më shumë kur ai thotë se laboratorët në Kosovë nuk kanë kushte për kontrolle të vazhdueshme për produkte ushqimore.
“Unë Arbër Taraku -inspektor i veterines pran kuvendit komunal Pejë , boj apel të gjithë qytetarëve të Kosovës , të kenë kujdes me produktet ushqimore të Serbis. Qytetar të nderuar duhet të jeni të vetdishem që produktet ushqimore Serbe jan të dyshimta , pasi qe unë ushtroj këtë profesion qe 10 vite ndjej obligim tju informoj se nuk ka kontroll të produkteve ushqimore siq duhet sepse laboratoret tona nuk kan kushte per kontroll te rregullt te produkteve”, ka thënë ai në postimin e tij në një faqe në Facebook, e cila mbante logon e Komunës së Pejës.
Ai ka akuzuar edhe qeverinë e Kosovës se nuk ka pasur vullnet politik për ta rregulluar këtë çështje përmes përmirësimit të kushteve dhe investimit në laboratorë përkatës të kontrollit të ushqimit.
“Keni kujdes Serbia tenton në çdo mënyrë të na dëmtojë kjo është mënyra më e lehtë dhe me tinëzare nëpërmjet ushqimit. Qeveria jonë nuk ka pas vullnetin të bëj kushtet për veprimin më efikas të kontrolleve të ushqimit që futen dhe tregtohen në Kosovë sidomos ato të Serbisë. Unë besoj që primare është të ruhet shëndeti publik”, ka përfunduar postimi që mban emrin e tij.
Pas këtij postimi, Komuna e Pejës ka reaguar, duke e quajtur inspektorin e veterinës si person të paautorizuar për deklarime të tilla. Madje, Komuna thotë se ai e ka keqpërdorur logon e komunës, duke hapur llogari false në Facebook me logon e saj.
“Njoftim zyrtar i Komunës së Pejës në lidhje me veprimin e papërgjegjshëm të personave, të cilët kanë hapur një llogari në facebook në emër të Komunës së Pejës të shoqëruar me logon e saj. Komuna e Pejës shpreh shqetësimin e saj me këtë veprim të bërë nga persona të papërgjegjshëm, të cilët me gjeste të tilla të ulëta mundohen të manipulojnë për qëllime të caktuara me qytetarë”, thuhet më tej në njoftim”, thuhet ndër të tjera në njoftim.
Taraku: Vendimi i pabazë dhe politik
Arbër Taraku ka thënë për tesheshi.com se vendimi për largimin e tij nga puna ka qenë politik dhe tendencioz, pasi që sipas tij nuk ka pasur asnjë arsye për ta larguar nga puna.
“Duket qartë vendimi se është politik dhe tendencioz, sepse nuk ka pasur asnjë shkelje nga ana ime, por vetëm kontribut 10-vjeçar pa kursyer as kohen dhe mundin tim për me rregulluar diçka për qytetin e Pejës. Merret vendim pa bazë ligjore, këta njerëz mendojnë qe komuna është private e tyre , i mbajnë në presion të gjithë zyrtarët e komunës, po ashtu dhe qytetarët e Pejës, nëse je me ne gjithçka është e mundur, nëse nuk je me ne gjithçka është e vështirë”, thotë Taraku.
Në lidhje me paralajmërimin e tij për rrezikun nga produktet serbe, ai ka thënë se produktet që vijnë nga ky shtet janë të dyshuara pasi që vijnë edhe në rrugë ilegale dhe nga aty janë shpërndarë nëpër gjithë Kosovën.
“Normal që produktet serbe janë të dyshimta për ne shqiptarët, sepse janë futur nga ana e Mitrovicës së veriut si kontrabandë dhe normal s’kanë pas kontrolle aty dhe janë shpërndarë ne gjithë territorin e Kosovës. Gjate punës time 10-vjeçare kam hasur në lloj-lloj vështirësi dhe produkte të ndryshme, por kemi punuar me vështirësi pasi kemi mungesë të kushteve elementare në Komunë”, ka thënë Taraku.
Ai thotë se largimi i tij nga puna për këtë arsye është i papranueshëm, ndërsa thotë se ata që e larguan nga puna duhet të mbajnë përgjegjësi për veprimet e tyre.
“Ky veprim i qëllimshëm i udhëheqësve komunalë, të bën të mendosh që pritet çdo gjë nga ana e tyre. Unë deklarohem se nëse e vërejë ndonjë kërcënim ose shantazh ose lojë të kësaj natyre nga ana e tyre ndaj meje ose familjes time, do veproj sipas nevojës që kërkohet për vetëmbrojtje, e përgjegjësinë lë ta mbajnë udhëheqësit e Komunës së Pejës për çdo veprim nëse ndodh , unë s’kam problem me asnjë njeri deri tani”, u shpreh Taraku. /tesheshi.com/
