Nuk kanë të sosur shkarkimet nga ministrat teknikë të propozuar të PD-së në qeverinë Rama. Ministri i drejtësisë, Gazmend Bardhi ka shkarkuar nga detyra këtë të mërkurë drejtorin e burgut në Berat, Arif Dervishi, si dhe atë të burgut të Kavajës, Durim Perja.
Shkarkimet janë bërë me motivin e përdorimit të institucionit për qëllime politike, pjesëmarrjes në fushata zgjedhore si dhe keqmenaxhimi. Ky vendim vjen pas inspektimeve të bëra nga Drejtoria e Përgjithshme e Burgjeve në të gjithë vendin. Po ashtu, ministri i Drejtësisë ka pranuar edhe dorëheqjen nga detyra drejtorin e burgut te Elbasanit.
Ministri Bardhi ka paralajmëruar çdo zyrtar që të mos përdorë funksionin publik për qëllime politike, sepse do të përballet me pasojat e këtij veprimi të paligjshëm, jo vetëm administrativisht, por edhe penalisht.
“Ministria e Drejtësisë fton çdo qytetar që të denoncojë, të gjitha rastet e përfshirjes në fushatë apo përdorimit të funksionit publik në favor të një subjekti zgjedhor, si dhe garanton qytetarët jo vetëm për ruajtjen e anonimatit, por edhe për ndjekjen me seriozitet maksimal të këtyre rasteve, duke qenë garant i zbatimit korrekt të ligjit.
ministri teknik siguron se është i vendosur në zbatimin e ligjit dhe do të veprojë me tolerancë zero për çdo veprimtari politike në kundërshtim me ligjin të punonjësve së administratës shtetërore në varësi të Ministrisë së Drejtësisë”,- thuhet në njoftimin e këtij institucioni. /tesheshi.com/
