Prokuroria për Krime të Rënda konfiskoi 3 milionë euro pasuri të paluajtshme të një shtetasi, i cili i kishte përfituar këto para, përmes aktiviteteve të paligjshme në Zvicër. Sipas prokurorisë, kjo pasuri i përkiste Fatmir Muçaj, por aktualisht gjykata shqiptare vendosi që të kalojë ato për llogari të shtetit.
Bëhet fjalë për 4 parcela “tokë arë” në Sauk, Tiranë, me sip.totale 14.600 m2, 2 parcela “tokë arë” në Gjirin e Lalëzit, Durrës, me sip.totale 2250 m2, parcela “tokë arë” në Marikaj, Durrës, me sip.totale 4000 m2, 2 apartamente në Tiranë, (në zonën e ish-“21 Dhjetorit” dhe rr.Muhamet Gjollesha”), me sip.totale 165 m2, si dhe 2 dyqane në zonën e Yzberishtit, Tiranë, me sip.totale 140 m2.
Hetimi për këtë rast është zhvilluar fillimisht nga Prokuroria e Tiranës, pas referimit të materialit nga ana e Drejtoria e Policisë, në vitin 2015. Në bazë të veprimeve hetimore ka rezultuar se shtetasi Fatmir Muçaj dhe familjarët e tij, Ervehe Muçaj dhe Liljana Thomai kanë në pronësi të tyre prona të paluajtshme, të cilat nuk i justifikojnë me të ardhura të ligjshme. Gjatë gjykimit, Prokuroria ka argumentuar se pasuritë e paluajtshme janë krijuar nga burime financare të paligjshme, të krijuara nga Fatmir Muçaj, gjatë aktivitetit kriminal në fushën e narkotikëve në mesin e viteve ’90.
Sipas hetimeve të kryera, ka rezultuar se Mucaj, lindur ne Berat dhe banues në Tirane është marrë me trafik të lëndëve narkotike të llojit heroinë dhe për këtë aktivitet ai është proçeduar nga autoritetet gjyqësore zviceriane. Gjatë këtij gjykimi, Muçaj pretendoi se të ardhurat e tij ishin të ligjshme. Sipas tij, ai ka jetuar si emigrant në Greqi, ku ka pësuar një incident në sy, për të cilin është kompensuar me 30 milionë dhrami. Sipas tij, ky dëmshpërblim mjekësor ka shërbyer si bazë fillestare financiare për krijimin e pasurive të paluajtshme ndër vite. Gjithashti, ai ka pretenduar se ka marrë edhe disa kredi financiare, të cilat janë investuar në prona të paluajtshme. Por, nga hetimi rezultoi se Fatmir Muçaj nuk posedonte dokumentacionin për të vërtetëtuar pretendimet e tij.
Ai akuzohet “Për parandalimin dhe goditjen e krimit të organizuar, trafikimit dhe korrupsionit nëpërmjet masave parandaluese kundër pasurisë”./tesheshi.com/
