Një avion, i cili dyshohet se kishte një itinerar nga Serbia për në Jordani ose Iran, u rrëzua mbrëmë rreth orës 23:00 në afërsi të Kavallës në Greqi, dhe ekipet e zjarrfikësve dhe ambulancat u dërguan menjëherë në vendin e përplasjes, ndërsa furnizimi me energji elektrike u ndërpre në fshatrat përreth.
Sipas informacioneve të para, bëhet fjalë për një avion ukrainas që po kryente një fluturim komercial (kargo) nga Serbia në Jordani dhe në të cilin ndodheshin 3 persona. Avioni lëshoi një sinjal rreziku për FIR-in e Athinës dhe ishte gati të bënte një ulje emergjente në Kavalla, pasi një nga motorët e tij dështoi dhe mori flakë, por u humb nga radari menjëherë pas kësaj dhe u rrëzua në perëndim të Kavallës.
Siç shihet në videot e publikuara, avioni ka marrë flakë dhe ka pas një shpërthim, ndërsa thuhet se shkak për këtë ka qenë një ngarkesë me eksploziv dhe municione në të.
https://youtu.be/UK4bIODq-lo
Edhe sipas mediave greke, bëhet fjalë për një avion që mbante municione. Kjo është arsyeja e shpërthimit.
Mediat gjithashtu deklarojnë se përmbajtja e avionit ishte “shumë e rrezikshme”. Për shkak të shpërthimeve të vazhdueshme, ekipet e zjarrfikëses dhe shpëtimit nuk mundën t’i afrohen vendit ku u rrëzua avioni ukrainas.
Gazetari Vaso Morali ka shkruar në profilin e tij në Facebook se avioni ka thyer edhe linjën e transmetimit kur ka rënë:
“Rreth orës 22:50, avioni në flakë ra në tokë, sipas dëshmitarëve okularë, në lindje të Nixiani (ndoshta midis Paleochori dhe Antiphilippi) dhe ndoshta mbi një linjë elektrike. Pasoi një shpërthim, u pa një dritë madhe dhe menjëherë më pas u shua energjia në Nikisian, Georgiai, Agios Kristoforos dhe Paleochori”.
Siç shkruan Flightradar24, avioni po fluturonte nga Nishi për në Aman dhe bëhet fjalë për aeroplan ukrainas të kompanisë Meridian Ltd. Avioni An-12BK, i cili u rrëzua, u ngrit për herë të parë në vitin 1971. Ai filloi të shërbente në Meridan në fillim të këtij viti.
Meridian LLC u themelua më 11 korrik 2003 dhe është një nga linjat e para private ajrore në Ukrainë dhe mori status ndërkombëtar duke u regjistruar në ICAO (Organizata Ndërkombëtare e Aviacionit Civil), duke marrë shenjën e thirrjes MEM. Aktiviteti i biznesit të kompanisë, siç thuhet në faqen e tyre zyrtare, është i fokusuar në transportin e mallrave në rrugët e brendshme dhe ndërkombëtare.
Kompania aktualisht punon vetëm me avionët Antonov AN-12. Meridian LLC aktualisht operon fluturime kargo çarter në të gjithë botën, në bazë të kontratave me organizata qeveritare dhe joqeveritare, për transportin e ndihmave humanitare. Meridian punon ngushtë me Kombet e Bashkuara dhe paktin e NATO-s, për transferimin urgjent të aseteve ushtarake, shkruan Blic. /tesheshi.com/
