Kryetari i bashkisë së Kievit, ish-boksieri profesionist Vitaliy Klitschko, tha se nuk kishte kuptim të debatohej, duke iu përgjigjur kritikave të Zelensky se nuk ishte bërë mjaftueshëm për të lehtësuar popullsinë që përballet me mungesat e energjisë dhe ngrohjes.
430 “qendra ngrohjeje” janë krijuar për të ndihmuar popullatën të përballet me pasojat e sulmeve ruse ndaj termocentraleve, tha kryebashkiaku. Është planifikuar hapja e 100 qendrave të tjera në rast të kushteve ekstreme, tha ai.
Presidenti Volodymyr Zelensky tha javën e kaluar se ai po merrte “veçanërisht shumë ankesa nga Kievi” në lidhje me masat.
“Unë nuk dua të tërhiqem në beteja politike, veçanërisht jo në situatën aktuale,” njoftoi Klitschko në Telegram, duke shtuar: “Është e kotë. Më duhet të punoj në qytet.”
Klitschko vlerësoi se këshilltarët e presidentit janë angazhuar në “manipulim” dhe “kjo nuk është mirë për ukrainasit apo për partnerët e huaj”.
“Sot kur duhet të jemi të bashkuar dhe të punojmë bashkë, po luhet një lloj loje politike”, tha ai.
Javën e kaluar, Zelensky inkurajoi hapjen e “qendrave të pathyeshmërisë” në të gjithë Ukrainën, strehimore ku banorët do të jenë në gjendje të qëndrojnë ngrohtë, të kenë ujë, internet, lidhje celulare dhe ilaçe falas, 24 orë në ditë.
Rusia ka bërë kërdi në objektet energjetike të Ukrainës pasi pësoi një sërë humbjesh në fushën e betejës dhe u tërhoq nga qyteti jugor i Khersonit, i vetmi qytet i madh që ka pushtuar që nga fillimi i pushtimit.
Në një fjalim nate të premten, Zelensky tha se kryetari i bashkisë së Kievit nuk bëri mjaftueshëm për të lehtësuar situatën për popullatën. Zelenskiy fitoi zgjedhjet e 2019-ës me shumicë, pesë vjet pasi Klitschko mori detyrën si kryebashkiak i Kievit. Para luftës, dy liderët u përplasën për mënyrën e organizimit të jetës në kryeqytet.
Deri në mëngjesin e së dielës kryesisht funksionon rryma, uji, ngrohja dhe telefonia mobile, është raportuar në aplikacionin Telegram. Punimet përfundimtare në rrjetin elektrik vazhdojnë, por janë të mundshme ndërprerje lokale për shkak të konsumit të lartë, njoftojnë autoritetet ushtarake. /tesheshi.com/
