Presidenti Tajip Erdogan cilësoi të mërkurën kryeministrin italian Mario Draghi si të “pafytyrë dhe parespek pasi e quajti atë një “diktator”.
Javën e kaluar, Draghi tha se Erdogan poshtëroi Presidenten e Komisionit Evropian Ursula von der Leyen gjatë një vizite në Ankara dhe se ishte e rëndësishme të ishe i sinqertë me “diktatorët”, gjë që rezultoi në dënim nga Ankaraja.
Në komentin e tij të parë publik mbi këtë çështje, Erdogan tha në një ngjarje në Ankara se Draghi kishte dëmtuar marrëdhëniet midis Turqisë dhe Italisë dhe sugjeroi që kryeministri italian nuk kishte asnjë legjitimitet demokratik për kritika të tilla, njoftoi Reuters.
“Deklarata e kryeministrit italian tregon vërtet pafytyrësi dhe mosrespekt. Në një kohë kur ne shpresonim që lidhjet midis Turqisë dhe Italisë mund të arrinin një pikë të mirë, duke dhënë këtë deklaratë, ky njeri me emrin Draghi për fat të keq prishi marrëdhëniet midis nesh”, tha Erdogan.
“Ju keni ardhur(në qeverisje) me bisedime, nuk jeni zgjedhur. Për të qenë në gjendje të bëni vërejtje të tilla në lidhje me Tajjip Erdogan, së pari duhet të jeni të vetëdijshëm për historinë tuaj. Por ne pamë që ju nuk e bëtë,” shtoi Erdogan, në një referencë të dukshme ndaj diktatorit fashist Benito Mussolini.
Draghi, ish-presidenti i Bankës Qendrore Evropiane, nuk erdhi në pushtet në zgjedhje, por presidenti italian e vendosi atë në krye të qeverisë së re në shkurt pasi koalicioni i mëparshëm dështoi në mes të mosmarrëveshjeve partiake. /tesheshi.com/
