Twitter hoqi flamujt e financimit ose përkatësisë qeveritare nga llogaritë e organizatave të ndryshme mediatike të premten, raportoi Reuters.
Twitter ka hequr etiketën e medias “të financuar nga qeveria” nga llogaritë e Radios Publike Kombëtare Amerikane (NPR), BBC dhe CBC kanadeze.
Etiketa “media e lidhur me shtetin kinez” u hoq gjithashtu nga llogaritë e agjencisë kineze të lajmeve Xinhua dhe llogaritë e gazetarëve që punonin për media të tilla.
Që nga viti 2020, llogaritë e mediave shtetërore kineze dhe redaktorëve të tyre dhe disa zyrtarëve kryesorë të qeverisë ishin të parat që morën përcaktimin, ndërsa mediat si NPR dhe CBC e morën përcaktimin vetëm në fillim të këtij muaji.
Si rezultat, NPR dhe CBC ndaluan postimet në llogaritë e tyre në Twitter, duke argumentuar se etiketa e caktuar nuk e përshkruante me saktësi statusin e tyre.
Në një intervistë për BBC javën e kaluar, miliarderi dhe pronari i Twitter, Elon Musk tha se Twitter po përpiqet të jetë “i saktë” dhe se po shqyrton mundësinë e ndryshimit të etiketës.
“Qëllimi ynë është thjesht të jemi sa më të vërtetë dhe të saktë. Ne po e rregullojmë etiketën në “të financuar publikisht” (media), gjë që është diçka kundër së cilës është e vështirë të argumentohet”, tha Musk.
Twitter, NPR, CBC dhe BBC nuk iu përgjigjën menjëherë një kërkese për koment mbi heqjen e etiketës.
Të enjten, Twitter hoqi gjithashtu shenjën blu nga profilet e mijëra njerëzve, duke përfshirë të famshëm, gazetarë dhe politikanë të shquar si Hillary Clinton.
Ish-presidenti i SHBA-së, Donald Trump, bashkë-themeluesi i Microsoft-it, Bill Gates dhe ylli i reality televiziv Kim Kardashian, janë ndër ata që kanë humbur simbolet e tyre. /tesheshi.com/
