Një nismë shumëvjeçare e AKP-së, Partisë për Drejtësi dhe Zhvillim, që e qeveris Turqinë prej më shumë se një dekade, është në fund të rrugës së saj.
Nesër turqit do të vendosin për ndryshimin e sistemit qeverisës, nga ai parlamentar në atë presidencial. Do të vendosin në do duan një Turqi më të qëndrueshme, më të rezistueshme ndaj krizave politike e gjithfarësh, më të prirur ndaj një ekonomie në lulëzim, apo në do t’i hapin udhë një vale të re paqëndrueshmërie, me shumë pikëpyetje.
Fushatën për “po” e kryesojnë natyrshëm AKP-ja dhe MHP-ja, partia qeverisëse dhe ajo opozitare e nacionalistëve, pa ndihmën e të cilëve paketa e amendamenteve nuk do të kishte mundur ta merrte miratimin. Në krahun tjetër, në të “jo”-së, janë opozitarët e CHP-së dhe HDP-së, republikanët dhe prokurdët, të zhgënjyerit nga pamundësia dhe paaftësia për ta marrë pushtetin kurdo që të bëhen zgjedhjet, si dhe nxitësit e vazhdueshëm të trazirave, që kurrë nuk kanë artikuluar një kundërvënie të plotë ndaj terroristëve të PKK-së.
Në një intervistë për transmetuesin shtetëror TRT mbrëmjen e së premtes, presidenti Erdogan ka nënvizuar se anketimet sugjerojnë se ndryshimet kushtetuese do të marrin miratimin e votuesve të dielën. Sipas tij, vota “po” kryeson diku me 55 për qind, e diku tjetër sillet mes 55 dhe 60 për qind.
Fushata për ndryshimet kushtetuese, e cila ka zgjatur për dy muaj, nisi më 10 shkurt, kur kreu i shtetit, Rexhep Tajjip Erdogan, nënshkroi paketën e amendamenteve kushtetuese të sjellë nga parlamenti.
Amendamentet i japin fuqi ekzekutive presidentit, duke i shkrirë bashkë presidencën dhe kryeministrinë për një sistem qeverisjeje më funksional, më të efektshëm.
Mbi 55 milionë është numri i votuesve në tërë vendin, në një kohë që votuesit e gjendur jashtë vendit e kanë hedhur tashmë votën e tyre.
Turqit do të kenë mundësi të votojnë nga ora 07:00 e mëngjesit në 16:00 të mbrëmjes në një pjesë të vendit, e nga 08:00 e mëngjesit në 17:00 të mbrëmjes në pjesën tjetër.
Rëndësi e veçantë i është kushtuar sigurisë në votimin e së dielës, me mijëra policë e forca xhandarmërie që do të jenë nesër në krye të detyrës. Në njësitë e shpërndarjes së energjisë do të ketë mbikëqyrje të posaçme, siç do të ketë njësi të gatshme për një sulm të mundshëm kibernetik. Vëmendje të posaçme do të ketë për institucionet e qeverisjes, për godinat partiake e për vendet publike, për të shmangur çfarëdo incidenti të mundshëm.
Referendumi i së dielës është një tjetër moment kyç në të tashmen e Turqisë, një tjetër moment vendimtar në hapat drejt prosperitetit të vendit euroaziatik. /tesheshi.com/
