Edhe pse situata mbetet ende e paqartë, duket se puçi ushtarak në Turqi po shkon drejt dështimit.
Njerëzit kanë vërshuar në rrugë pas thirrjes së presidentit Rexhep Tajjip Erdogan. Valë pa fund njerëzish me flamujt e Turqisë janë nisur në Stamboll drejt aeroportit të vendit. Tanket e dala në rrugë po kthehen në vendet e tyre.
Televizioni shtetëror turk vazhdon të mos transmetojë, me sinjalin të ndërprerë prej orësh, ashtu si dhe disa televizione të tjera.
Ezani është dëgjuar në të gjitha xhamitë e vendit, prej dhe nga është bërë thirrje që njerëzit të derdhen në sheshe për të mbrojtur rendin kushtetues.
Të gjitha partitë kryesore politike kanë shprehur kundërshtinë ndaj puçit ushtarak, si republikanët e CHP-së, ashtu dhe nacionalistët e MHP-së. Një falënderim i veçantë ka shkuar për udhëheqësit e tyre nga kryeministri i vendit.
Flitet më së paku për 17 policë të vrarë në përpjekjet për grusht shteti, ashtu si dhe për shumë të plagosur.
Zëvendëskryeministri i vendit, Numan Kurtulmush, sapo ka folur për një kanal televiziv, ku nuk ka pranuar të bëjë specifikime me emra mbi organizatorët e këtij grushti shteti. Megjithatë, ai është shprehur besimplotë se e nesërmja do ta gjejë Turqinë të çliruar nga kthetrat e puçistëve.
Ka zëra për marrjen peng të shefit të shtabit të përgjithshëm të ushtrisë, por Yeni Şafak sapo lajmëron për një komunikim të presidentit me të, e lajmërohet se Hulusi Akar është në krye të detyrës.
Njëri prej helikopterëve në duart e puçistëve sapo njoftohet se është rrëzuar. /tesheshi.com/
