Nga “lufta” në Egje, lufta greko-turke tashmë kalohet në kuzhinë. Turqit ishin të indinjuar nga fakti që kukureci dhe imam bajalldia paraqiten në SHBA si ushqime greke. Shumë turq reaguan nëpër mediat sociale, duke folur për vjedhjen e pjatave turke nga grekët.
“Pas bakllavasë dhe xaxiqit, Greqia përvetëson kukurecin dhe imam bajalldi”, shkruajnë mediat turke, duke pretenduar se këto gatime vijnë nga kuzhina osmane.
Konkretisht, ata theksojnë se faqet greke të internetit me receta e përshkruajnë imam bajalldi si ushqim grek, por siç theksojnë, është një pjatë turke dhe do të thotë “imamit i ra të fikët”.
“Uebfaqet me receta nga shteti fqinj shkruajnë se imam bajalldia është një recetë klasike greke. Rrënjët e saj vijnë nga periudha e sundimit osman. Emrin e ka marrë nga një hoxhë që e ka ngrënë dhe i ka pëlqyer shija aq shumë sa i ka rënë të fikët, sepse patëllxhani i pjekur dhe domatet e kripura i japin shije të mrekullueshme. Grekët e Kostandinopojës e bënin këtë gjellë. Prej aty erdhi në Greqi dhe në SHBA e shërbejnë si ushqim grek”, ankohen mediat turke, duke thënë se kjo shkruhet në faqet greke dhe se njëjta gjë pretendohet dhe për kukurecin.
Mjeshtri i njohur i kukurecit në Stamboll, Seref Ilgar tha: “Ata përqafojnë kulturën turke për shkak të admirimit të tyre për turqit. Kukureci është një pjatë turke, e cila kombinohet me erëzat tona turke”.
Tekin Lok, pronar restorantesh në Stamboll tha se “është një trashëgimi që kemi marrë nga osmanët”. “Kukureci është e kaluara jonë”. /tesheshi.com/
