Sekretari i Përgjithshëm i NATO-s, Jens Stoltenberg shprehu shqetësim lidhur me pasojat që mund të sjellë brenda Aleancës plani i Turqisë për blerjen e sistemit rus të raketave S-400, duke pasur parasysh se Uashingtoni ka kërcënuar me sanksione.
Ai tha në një konferencë shtypi me ministrin e jashtëm turk Mevlut Çavusoglu, se NATO dëshiron të shmangë rrethanat në të cilat aleatët vendosin sanksione mbi njëri-tjetrin, raporton Reuters.
Stoltenberg gjithashtu foli me Presidentin Erdogan, i cili tha se vendimi i Turqisë për të blerë sistemin rus S-400 nuk do të thotë se po kërkon “alternativa” për marrëdhëniet e saj me Perëndimin.
Nga ana tjetër, agjencia ruse Tas transmeton një deklaratë nga një diplomat ushtarak rus, se rreth 100 ushtarë turq do të fillojnë një trajnim 5-mujor për përdorimin e sistemit raketor S-400.
Ai shtoi se pritet ofrimi i këtyre sistemeve në Turqi në vitin 2019. Një trajnim i ngjashëm në mars filloi nga një grup ushtarësh kinezë.
“Trajnimi i njëkohshëm i ushtarëve kinezë dhe turq për sistemin e raketave është unik në historinë e Bashkimit Sovjetik ose Rusisë”, tha ai. /tesheshi.com/
