Që nga dita e nënshkrimit të Marrëveshjes së Ohrit e deri sot, si e tillë ajo asnjëherë nuk ka qenë në shërbim të komunitetit turk. Kështu e konsiderojnë nga partia e turqve në Maqedoni, aktin e njohur politik që i dha fund konfliktit të vitit 2001 e që një ditë më parë shënoi 16-vjetorin e nënshkrimit.
“Që të kalojë ky problem, konsideroj se Marrëveshja e Ohrit duhet të zbatohet në mënyrë transparente dhe gjithëpërfshirëse. Deri tani kjo marrëveshje ka shërbyer si mjet për tregje politike, ndaj dhe nuk ka qenë produktive për të gjitha bashkësitë etnike”, tha deputeti dhe sekretari i përgjithshëm i Partisë për Lëvizja e Turqve, Enes Ibrahimi.
Ai shpreson se me ardhjen e qeverisë së re në pushtet, ka disa shenja që tregojnë dëshirën për tejkalimin e marrëdhënieve diskriminuese të përbërjes së mëparshme qeveritare dhe kjo i jep shpresë se po lëvizet në drejtim të duhur.
“Qeveria e re është shpresa e fundit për bashkësinë turke dhe besoj se me lëvizjet e reformave turqit do ta marrin vendin e dëshiruar dhe merituar në jetën shoqërore”, shtoi Ibrahimi. /tesheshi.com/
