Turqit dhe palestinezët përkujtuan viktimat e sulmit mbi Mavi Marmara-në

Në vitin e pestë të sulmit izraelit në ujërat ndërkombëtare mbi anijen Mavi Marmara, mijëra turq e palestinezë dolën në rrugë për të përkujtuar viktimat.

Në lagjen Fatih të Stambollit qindra njerëz mbushën rrugët, duke mbajtur në duar flamujt turq e palestinezë, për t’u mbledhur më pas në një xhami. Pasi kryen lutje brenda dhe jashtë xhamisë, manifestuesit dëgjuan fjalët e babait të një prej të rënëve në atë sulm, të 19-vjeçarit Furkan Dogan, “Im bir mund të ketë vdekur, por të gjithë ne këtu jemi Furkan Doganë të rinj që luftojmë për drejtësi.”

Pas aktiviteteve të ndryshme, grumbujt e njerëzve u drejtuan në mbrëmje për nga varrezat ku prehen të rënët. Gjatë rrugës u dëgjuan sloganet, “Mavi Marmara-ja është krenaria jonë,” “Muslimanë, mos flini, mbroni vëllezërit tuaj.”

Në kryeqytetin turk, në Ankara, dhjetëra njerëz e kryen faljen e mëngjesit para rezidencës së ambasadorit izraelit. Aktivitete në përkujtim të viktimave pati dhe në Kajseri.

Palestinezët në Gaza vendosën një kurorë në memorialin e ndërtuar për viktimat. Të pranishmit mbanin banderola ku shkruhej, “Populli turk, ne ju përshëndesim.”

Xhemal Hudari, drejtuesi i Komitetit Popullor Kundër Rrethimit, tha mes të tjerash në fjalën e tij, “Ne jemi mbledhur këtu për të nderuar ata që bënë sakrificën më të madhe dhe vdiqën për Palestinën. Ne ju dërgojmë përshëndetjet tona të afërmve të dëshmorëve dhe presidentit Rexhep Tajjip Erdogan.”

Komandot izraelite sulmuan më 31 maj 2010 anijen Mavi Marmara, pjesë e Flotiljes së Lirisë, duke vrarë nëntë qytetarë turq, përfshirë një adoleshent me nënshtetësi turke dhe amerikane, e duke lënduar pesëdhjetë të tjerë. I dhjeti vdiq katër vite më vonë, i gjendur në koma pas plagëve të marra.

Flota me gjashtë anije me ndihma po përpiqej të thyente bllokadën izraelite, të vënë që në vitin 2007, e që ka sjellë papunësi e varfëri të skajshme në Gaza.

Izraeli kërkoi zyrtarisht ndjesë në vitin 2013 për ato që i quajti “gabime operacionale”. Turqia dhe Izraeli janë në negociata për një marrëveshje dëmshpërblimi, por ende nuk ka një rezultat përfundimtar.

/tesheshi.com/