Turqia shkon në zgjedhje të përgjithshme më 1 Nëntor, gati pesë muaj nga votimet që sollën një rezultat të papërcaktuar, pasi asnjë parti nuk fitoi shumicë të mjaftueshme për formimin e Qeverisë.
Njoftimi vjen pasi presidenti Recep Tayyip Erdogan bëri thirrje për caktimin e zgjedhjeve të reja.
Data duket është vendosur duke marrë parasysh edhe dimrin që po afron, që është i ashpër sidomos në lindje dhe në juglindje të vendit.
Që nga zgjedhjet e qershorit, ku partia për Drejtësi dhe Zhvillim humbi shumicën dhe partia prokurde HDP hyri në parlament për herë të parë, Turqia është përballur me një valë trazirash e sulmesh, kërcënimin nga Shteti Islamik dhe rënie të lirës turke.
Kryeministri Ahmet Davutoglu dështoi të formojë qeveri koalicioni pas bisedimeve me partitë e tjera parlamentare.
Tashmë, Davutoglu do të formojë një administratë provizore dhe të përgatisë zgjedhjet. /tesheshi.com/
