Kur janë numëruar 98.4 për qind e votave, festa ka shpërthyer në sheshet e qyteteve turke për fitoren e votës “po” në referendumin për ndryshimet kushtetuese.
Nuk ka qenë një fitore e lehtë, edhe pse ngjau e tillë kur qe numëruar çereku i votave të hedhura në kutitë e votimit.
51.32 për qind të votave janë në favor të ndryshimeve kushtetuese, krahasuar me 48.68 që kanë shkuar kundër këtyre ndryshimeve.
Vota “po” ka triumfuar në referendum pavarësisht gjithçkaje, fake news-eve, mashtrimeve, shtrembërimeve, bllokimit të tubimeve të shtetarëve turq me qytetarët e tyre në vendet europiane, fushatës shpërudhëse mediatike, e deklaratave të papërgjegjshme.
“Populli tha ‘po’, Turqia fitoi,” “Vendimi i popullit ‘po’,” “Fitorja e Turqisë përballë Perëndimit,” “’Po’ për stabilitetin dhe sistemin e ri,” “Fjalën e fundit e tha populli, ‘po’,” “Fitorja e popullit, rilindja e Turqisë,” “Po lind Turqia e re,” “Revolucioni i Anadollit,” janë disa prej titujve në televizionet turke pasi rezultati u bë i njohur.
Fitorja në referendum përmbyll edhe një reformë tjetër të AKP-së që prej ardhjes së saj në pushtet 15 vite më parë. Fitorja në referendum është dhe fitorja e Rexhep Tajjip Erdoganit, e katërmbëdhjeta për të gjatë tërë kësaj periudhe.
Ndryshimet kushtetuese kanë marrë votën “jo” në Ankara, Stamboll e Izmir, por janë miratuar me votën “po” në pjesën dërrmuese të territorit turk, posaçërisht në pjesën qendrore të tij.
Me ndryshimet e reja kushtetuese, sistemi qeverisës bëhet presidencial, posti i kryeministrit suprimohet, dhe presidenti, zëvendëspresidenti e anëtarët e kabinetit mund të hetohen nga parlamenti. /tesheshi.com/
