Largimi nga kjo botë i Sulejman Demirelit ka qenë dje lajmi kryesor në mjetet turke të informimit, si dhe e ka ndryshuar tërësisht axhendën aktuale politike të vendit, duke e kaluar atë në plan të dytë.
Turqia shpalli tre ditë zie kombëtare, ndërsa krerët e shtetit e ngritën lart rolin e Sulejman Demirelit në zhvillimin demokratik të vendit.
Erdogani, presidenti turk, do të shkruante në mesazhin zyrtar të ngushëllimit, të publikuar në faqen elektronike të presidencës: “Sulejman Demireli, i cili la shenjë të thellë në historinë politike turke dhe kontribuoi për procesin e zhvillimit të vendit tonë, është midis figurave të spikatura të historisë sonë politike, si politikan dhe shtetar. Ai do të kujtohet gjithashtu nga populli ynë në të ardhmen me detyrat që ndërmori, me shërbimet që kreu, dhe me rolin e tij në politikë.”
Me të njëjtin ton, pasi shprehu ngushëllimet e tij, kryeministri Davutogllu shpalli tre ditët e zisë kombëtare, duke filluar nga e mërkura.
Funerali shtetëror i Demirelit do të zhvillohet ditën e nesërme në Ankara. /tesheshi.com/
