Edhe pse Bashkimi Europian nuk e mbajti më herët premtimin për heqjen e vizave për qytetarët turq, një propozim të ri do të ketë në tavolinë për të.
Një dokument i ri me propozime do t’i paraqitet BE-së në maj nga Turqia në lidhje me marrëveshjen për liberalizimin e vizave, ka bërë të ditur ministri turk për çështjet e BE-së, Ömer Çelik, në një intervistë televizive.
Ai ka paralajmëruar se mospranimi i propozimeve do të sjellë bllokimin e marrëveshjes për refugjatët, për të cilën Turqia po vijonte të përmbushte pjesën që i takon.
“Nëse e pranojnë propozimin tonë, marrëveshja [për refugjatët] do të përmbushet në mënyrë pozitive, ndryshe do të ketë ndërprerje të saj,” tha Ömer Çelik për televizionin CNN Türk.
Një marrëveshje e marsit të 2016-s mes BE-së dhe Turqisë parashikonte mes të tjerash mbylljen e rrugëve të emigracionit të paligjshëm në Egje dhe kthimin në Turqi të refugjatëve që kishin kaluar në ishujt grekë. Turqisë do t’i premtohej në shkëmbim heqja e vizave; një premtim i papërmbushur ende.
Ministri turk në fjalë deklaroi se liberalizimi i vizave ishte një e drejtë që Turqia e meritonte, ngase e kishte respektuar marrëveshjen për refugjatët dhe kishte bërë atë çka i takonte për të. /tesheshi.com/
