Një rol më aktiv në muajt e ardhshëm në zgjidhjen e çështjes siriane, në përpjekje për të penguar ndarjen e Sirisë mbi baza etnike, është ajo çfarë ka premtuar sot kryeministri turk në një takim me gazetarë të huaj.
“Turqia do të jetë më aktive në çështjen siriane në gjashtë muajt e ardhshëm, si një aktor rajonal. Kjo do të thotë se nuk do të lejohet që Siria të ndahet mbi baza etnike; kjo është me rëndësi vendimtare për Turqinë,” do të deklaronte Binali Jëlldërëm.
Shefi i qeverisë turke paralajmëroi shtimin e përpjekjeve për të zvogëluar paqëndrueshmërinë në rajon.
“Ne shohim se gjakderdhja duhet ndalur. Foshnjat, fëmijët e njerëzit e pafajshëm nuk duhet të vdesin. Kjo është arsyeja pse Turqia do të jetë më aktive në përpjekjen për të ndaluar përkeqësimin e gjendjes në gjashtë muajt e ardhshëm krahasuar me atë çka është lënë pas.”
Sa për rolin e Beshar Esadit, Jëlldërëm deklaroi se ai nuk mund të ketë rol në të ardhmen e Sirisë. Por ai ka shtuar se Esadi mund të qëndrojë përkohësisht gjatë një periudhe kalimtare, pasi, sipas kryeministrit të Turqisë, “na pëlqen apo nuk na pëlqen, ai është një nga aktorët sot”.
“Ne besojmë se PKK-ja, DAESH-i dhe Esadi nuk duhet të jenë në të ardhmen e Sirisë,” është shprehur Binali Jëlldërëm. /tesheshi.com/
