Ministri turk i Mbrojtjes Hulusi Akar paralajmëroi aleatët kundër, siç tha, provokimeve të vazhdueshme, praktikave ofenduese dhe të paligjshme të kryera nga autoritetet greke kundër vendit të tij dhe tha se Turqia do të vazhdojë të përgjigjet në mënyrë adekuate.
“Ne i jemi përgjigjur gjithmonë kësaj pafytyrësie të Greqisë dhe do të vazhdojmë ta bëjmë këtë”, tha Akar në një ceremoni ushtarake në provincën turke të Eskishehirit, raporton Anadolia.
Duke treguar për përgjimin e fundit të avionëve turq nga Greqia mbi detin Egje dhe Mesdheun lindor, Akar tha se ata avionë turq ishin të angazhuar në një mision të NATO-s.
“Nga 2 korriku, misioni informoi të gjithë aleatët e NATO-s për aktivitetin e tij, të gjithë e dinin. Është e pamundur që Athina të mos ketë ditur për misionin. Megjithatë, ata përgjuan avionët tanë F-16, të cilët kryenin detyrën në NATO. Greqia bëri një deklaratë të rreme, duke pretenduar se nuk e dinin që këta ishin avionë turq”, tha Akar.
Një paralajmërim për aleatët
Duke theksuar se lëvizjet e Greqisë janë jashtëzakonisht armiqësore dhe të gabuara, Akar tha se NATO dhe vendet e treta duhet të shohin gjithashtu veprimet e Greqisë.
“Ne i paralajmëruam të gjithë aleatët tanë për Greqinë. Ne presim që ata të jenë objektivë. Ata duhet të dinë se veprimet dhe retorika e Greqisë nuk janë në përputhje me miqësinë apo aleancën”, tha Akar.
Duke vënë në dukje se Ankaraja monitoron nga afër veprimet e Athinës që “neglizhojnë të drejtën ndërkombëtare, marrëdhëniet e fqinjësisë së mirë dhe miqësinë”, ministri turk i Mbrojtjes tha se Turqia vazhdon punën e saj, jo në kurriz të NATO-s dhe aleatëve të saj, por si një vend që mban barrë.
Që nga fillimi i vitit 2022, avionët luftarakë grekë kanë shkelur 256 herë hapësirën ajrore turke dhe kanë shqetësuar avionët turq 158 herë, shkruan Anadolia. Anijet e rojes bregdetare greke kanë shkelur gjithashtu 33 herë ujërat territoriale turke. /tesheshi.com/
