Turqia përcolli një mesazh të fortë nga Prishtina për Kosovën.
Ishte ministri i Mbrojtjes i Ankarasë Yasar Guler që dha garanci se kufijtë e Kosovës nuk do mund të preken.
“Ne e përkrahim sovranitetin dhe tërësinë territoriale të Kosovës, unifikimin me institucionet euroatlantike dhe anëtarësimin e saj në organizatat ndërkombëtare”, u shpreh Guler.
Në një konferencë për shtyp me homologun kosovar Ejup Maqedonci, ai theksoi rëndësinë e thellimit të bashkëpunimit mes Prishtinës dhe Ankarasë në të gjitha fushat. Gjithashtu foli për detyrën e komandantit të ri të KFOR-it.
“Theksuam faktin se duke nisur nga Kosova, paqja lumturia dhe siguria në Ballkan për ne është çështje që ka peshë të madhe… Ne themi se dialogu është rruga e vetme e paqes dhe stabilitetit afatgjatë në këtë rajon dhe ritheksuam faktin se detyrën e komandantit të KFOR-it, e kemi marrë përsipër dhe do ta realizojmë me neutralitet dhe transparencë të plotë”, theksoi ai. /tesheshi.com/
