Turqia dhe Izraeli po zhvillojnë bisedime për përmirësimin e marrëdhënieve mes tyre, të ndërprera thuajse plotësisht që prej sulmit izraelit mbi anijen Mavi Marmara gjashtë vite më parë.
Të takuar fillimisht në dhjetor të 2015-ës, zyrtarët e dy vendeve arritën një marrëveshje paraprake për normalizimin e marrëdhënieve, përfshirë dhe kthimin e ambasadorëve respektivë.
Ndërsa dialogu mes palëve vijon ende, zëdhënësi i presidentit turk ka kujtuar dje se vendi i tij nuk do të pushojë së kërkuari që bllokada izraelite ndaj Gazës të marrë fund.
“Eshtë e papranueshme ajo që ngjet në Gaza,” ka thënë Ibrahim Kallën, “dhe pushtimi nga Izraeli duhet të marrë fund.”
Kallën hodhi dritë mbi fatin e bisedimeve, duke sqaruar se ato do të vazhdojnë dhe në javët e ardhshme, e se nuk ka ende një marrëveshje përfundimtare mbi një tekst për përmirësimin e marrëdhënieve.
Në diskutimet mes palës turke dhe izraelite një vend të veçantë ka çështja e kompensimit për familjet e viktimave të incidentit me Mavi Marmara-në.
Ndër kushtet e Turqisë për normalizimin e marrëdhënieve me Izraelin është dhënia fund bllokadës ndaj Gazës dhe kompensimi për viktimat e anijes Mavi Marmara. /tesheshi.com/
