Sulmi i para pak orëve mbi Siri ka marrë miratimin e Turqisë, si një përgjigje e duhur.
Në reagimin e Ministrisë së Jashtme turke thuhet se, “Turqia beson se është me rëndësi kritike që krime të tilla nuk kalojnë të pandëshkuara”, duke iu referuar sulmit me armë kimike në Duma një javë më parë.
Ankaraja zyrtare deklaroi se do të ishte e pamendueshme të qëndrohej pa reaguar ndaj sulmeve kimike të regjimit të Esadit ndaj popullsisë civile.
“Daily Sabah” njofton po ashtu për një reagim të zëdhënësit të presidentit turk, Ibrahim Kallën. Deklarata e tij shpreh mirëpritjen e sulmeve, por shton se përqendrimi vetëm te shkatërrimi i armëve kimike nuk mjafton për t’i dhënë fund paqëndrueshmërisë në rajon, e se synimi duhet të jetë përfundimi i luftës në Siri.
Ndërkohë, zëdhënësi i AKP-së, partisë në pushtet, bëri të ditur se Turqia ishte informuar për sulmet përpara nisjes së tyre.
Mahir Ynal tha se kishte një ndarje informacioni para operacionit mes Turqisë, SHBA-së, Britanisë dhe Francës.
“Ne e shohim këtë sulm si një sanksion kundër përdorimit të armëve kimike…,” u shpreh ai në një intervistë televizive.
Presidenti turk, Rexhep Tajjip Erdogan, ka patur në dy ditët e fundit biseda telefonike me presidentin amerikan, Donald Trump, dhe me atë rus, Vladimir Putin, në përpjekje për t’i ulur tonet e përplasjes deri tash verbale midis dy shtetarëve më të fuqishëm të botës. /tesheshi.com/
