Zëdhënësi i presidentit turk ka deklaruar se Turqia po ushtron presion për nisjen e një armëpushim në Halep para Kurban Bajramit.
Ibrahim Kallën ka folur për diskutime të presidentit Erdogan me Obamën dhe Putinin në Kinë, në takimin e G20-tës, për një ndërprerje të mundshme të luftimeve në Halep, në qytetin në veri të Sirisë, të kthyer në gërmadhë e ku luftohet ashpërsisht.
Erdogani e ka diskutuar çështjen me ta në mënyrë të përsëritur, ka rrëfyer zëdhënësi i tij, duke kërkuar një materializim sa më të shpejtë të armëpushimit.
Ai ka treguar dhe për një telefonatë të Erdoganit me Putinin një javë para takimit të G20-tës. “Kurban Bajrami po vjen. Le ta planifikojmë armëpushimin sipas ndjeshmërive të botës muslimane. Njerëzit në Halep dhe përreth do të marrin frymë lirisht së paku gjatë Kurban Bajramit,” mësohet t’i jetë shprehur Erdogani shefit të Kremlinit.
Kallën ka thënë se armëpushimi do të shërbente për hapjen e korridoreve humanitare.
Trupat e regjimit sirian kanë rikthyer të dielën rrethimin mbi pjesën lindore të Halepit, të kontrolluar nga kryengritësit. Halepi mbetet fronti kryesor në betejën mes forcave qeveritare dhe kundërshtarëve të regjimit. /tesheshi.com/
