Presidenti Rexhep Tajjip Erdogan ka dhënë sot miratimin për amendamentet kushtetuese, duke hapur rrugën për referendumin që do të vendosë nëse vendi do të kalojë nga sistemi parlamentar në atë presidencial.
Miratimi nga presidenti turk sot mbyll një etapë të gjatë të përpjekjeve për ndryshime kushtetuese, të nisura prej kohësh e që kanë si objektiv t’i japin vendit më stabilitet e një qeverisje më efektive.
Kryeministri i vendit, Binali Jëlldërëm, bëri të ditur pak pas aktit të presidentit datën e zhvillimit të referendumit, që do të jetë 16 prilli.
“Presidenti ynë ka miratuar amendamentet kushtetuese, kështu që data e votës publike është bërë e qartë. Në dashtë Zoti, referendumi do të zhvillohet më 16 prill. Qytetarët tanë do të japin miratimin përfundimtar për këtë paketë të reformës kushtetuese, të plotësuar nga parlamenti ynë dhe të nënshkruar nga presidenti ynë.”
Miratimi i paketës së reformës kushtetuese në parlament u mundësua nga votat e deputetëve të partisë në pushtet, AKP-së, si dhe të nacionalistëve të MHP-së, ndërsa u kundërshtua nga partia kryesore opozitare, CHP-ja, dhe nga kurdët e HDP-së. Palët nuk pritet të ndryshojnë qëndrim dhe gjatë fushatës para referendumit. /tesheshi.com/
