Tragjeditë e emigrantëve në det janë në krye të lajmeve ndërkombëtare, por së fundmi, raportet po flasin edhe për një shqetësim.
Vjedhja e jahteve në brigjet turke të Egjeut është më tepër se një krim ordiner, pasi ato po përdoren për të kontrabanduar emigrantët nga Turqia drejt ishujve të Greqisë.
Sipas së përditshmes turke Sabah, viktima e fundit e vjedhjeve ishte kreu i klubit futbollistik Beshiktash, Fikret Orman.
Jahti i tij, i quajtur “Il Paradizo”. ishte ankoruar në portin e Bodrumit, por pas pak kohe u gjet i braktisur në ishullin grek Kos.
Përgjatë gjithë verës, së paku 9 jahte janë vjedhur për të kryer kontrabandim me emigrantë. Numri i tyre llogaritet të jetë shumë më i madh, por 9 është numri i atyre që kanë paraqitur ankesa në polici.
Kontrabandimi i emigrantëve është kthyer në biznes fitimprurës, qysh kur Siria është zhytur në luftë civile. Shuma që paguhet për kalim nga Turqia në Evropë është afro 2000 dollarë. /tesheshi.com/
