Turqia ka thënë se po mbyll hapësirën e saj ajrore për avionët civilë dhe ushtarakë rusë që fluturojnë në Siri.
Ministri i Jashtëm turk Mevlut Çavusoglu thotë se ndalimi do të jetë në fuqi për tre muaj, njoftuan mediat turke.
“Ne kemi mbyllur hapësirën ajrore për avionët ushtarakë rusë dhe gjithashtu për avionët
civilë të nisur nga Siria që transportojnë trupa,” tha kreu i diplomacisë turke, pa dhënë detaje mbi motivin e vendimit.
Ai tha se për këtë vendim kishte njoftuar homologun e tij rus Sergey Lavrov, i cili nga ana e tij do të informojë presidentin rus Vladimir Putin.
Ky veprim minon fushatën ajrore në shkallë të gjerë të Rusisë në mbështetje të presidentit sirian Bashar al-Assad, duke i detyruar avionët rusë të marrin rrugë më të gjata. Turqia mbështet grupet e rezistencës në Siri që kundërshtojnë presidentin Assad.
Turqia, një anëtare e NATO-s, është përmbajtur nga sanksionet e gjera të vendosura ndaj Rusisë nga Bashkimi Evropian dhe Shtetet e Bashkuara për pushtimin e saj në Ukrainë, por ka bllokuar anijet luftarake ruse të hyjnë në Detin e Zi përmes ujërave të tyre.
Qeveria turke po përpiqet të ndërmjetësojë mes Rusisë dhe Ukrainës për të arritur një armëpushim.
Miliona rusë shkojnë për pushime në Turqi çdo vit, por konflikti në Ukrainë pritet të shkaktojë një rënie të madhe të vizitave nga rusët dhe ukrainasit këtë vit.
Nga ana tjetër, siç dihet, ashtu siç Rusia i shkoi në ndihmë Assadit duke ndërmarrë një fushatë të egër ushtrake në Siri, tashmë krah saj në Ukrainë po luftojnë rekrutë sirianë, nga ata të lidhur me regjimin e Damaskut. /tesheshi.com/
