Duke folur për një televizion vendas, ministri i Jashtëm turk, Mevlyt Çavushogllu, ka deklaruar se Turqia do të shfrytëzojë të drejtën për t’u vetëmbrojtur nëse përballet me një kërcënim nga Iraku mbi kufijtë e saj. Vetëmbrojtja, sipas autoritetit turk, përfshin dhe operacionet tokësore.
Çavushogllu tha se vendi i tij mund të ndërmarrë hapa si ato në Siri nëse rritet niveli i kërcënimeve nga Sinxhari dhe nga territoret e tjera irakiane.
Forcat ushtarake turke nisën në gusht operacionin “Mburoja e Eufratit”. Në bashkëpunim me Ushtrinë e Lirë Siriane janë pastruar nga grupet terroriste territore të tëra në Siri, duke filluar nga Xherablusi.
E njëjta gjë mund të ngjasë dhe në Irak, la të kuptohet ministri i Jashtëm turk.
Iraku dhe Turqia po kalojnë një periudhë të tensionuar mes tyre. Trupat turke në kampin e Bashikas dhe dëshira e forcave turke për të qenë pjesë e operacionit për çlirimin e Mosulit janë dy çështjet kryesore që kanë sjellë tensionimin e situatës, ndërsa Iraku kërkon largimin e tyre dhe nuk pranon që Turqia të jetë pjesë e mësymjes në shkallë të gjerë. /tesheshi.com/
