Turqia ka thënë se anija kërkimore “Oruc Reis”, e cila operonte në ujërat e diskutueshme në Mesdheun lindor midis një serie mosmarrëveshjesh me Greqinë, do të vazhdojë misionin e saj në brigjet jugore të vendit deri në mes të qershorit.
Anija, e shoqëruar nga dy anije luftarake, do të vazhdojë misionin e saj pranë brigjeve të Antalias dhe kjo lëvizje ka shumë të ngjarë të çojë në një konflikt me Greqinë, raporton Reuters.
Misioni do të zgjasë për gjashtë muaj, nga 22 dhjetori i këtij viti deri më 15 qershor të vitit të ardhshëm.
Ministri i Jashtëm turk Melvut Çavusoglu tha javën e kaluar se Ankaraja, megjithë sanksionet e mundshme të Bashkimit Evropian, nuk do të heqë dorë nga të drejtat dhe interesat e saj në Mesdheun Lindor.
Turqia tërhoqi anijen “Oruč Reis” nga ujërat e diskutueshme në Mesdheun lindor përpara dy samiteve të BE, duke bërë që Presidenti i Këshillit Evropian Charles Michel të thotë se loja “mace dhe mi” midis BE dhe Ankarasë duhet të marrë fund.
Në një samit të BE këtë muaj, krerët e Unionit ranë dakord të përgatisin sanksione të kufizuara ndaj individëve në Turqi rreth mosmarrëveshjeve të energjisë me Greqinë dhe Qipron, por që të gjitha lëvizjet më të ashpra janë shtyrë deri në mars.
Krerët e BE planifikojnë të diskutojnë eksportet e armëve në Turqi me aleatët e NATO-s dhe Uashingtonin, pasi Greqia “shtyu” futjen e një embargoje armësh.
Greqia dhe Turqia janë në mosmarrëveshje për kufijtë detarë dhe të drejtat për burimet e mundshme të naftës dhe gazit në Mesdheun lindor.
Tensionet u thelluan në gusht, kur Ankaraja dërgoi anijen “Oruc Reis” në ujërat që Athina i konsideron të vetat. /tesheshi.com/
