Turqia tashmë ka dëbuar tetë persona, pjesë e organizatës ISIS, drejt vendeve të origjinës, përkatësisht në Gjermani dhe Britani. Fuqitë perëndimore në Evropë, të cilat me Turqinë i bashkon angazhimi në NATO, kohë më parë i kishte kapur panik se ofensiva e Turqisë në një zonë kufitare siriane mund të kthejë pjesëtarët e IS-it dhe familjet e tyre në vendet e origjinës.
Autoritetet turke dje kanë bërë me dije se kanë dëbuar një shtetas gjerman dhe një shtetas amerikan, ndërsa sot njoftuan për shtatë të dëbuar nga Turqia në Berlin. Sipas Reuters, grupi përbëhej nga dy burra, katër gra dhe një fëmijë.
Ministria e Jashtme e Gjermanisë kishte thënë të hënën se Ankaraja kishte njoftuar Berlinin për 10 persona që po i dëbonte, pa dhënë detaje nëse personat në fjalë kishin qenë pjesë e milicisë, apo pjesë e të ngujuarve në kampe.
Aktualisht, vështirësia me të cilën përballen autoritetet gjermane është se në bazë të ligjit gjerman, këta njerëz nuk mund të akuzohen për ndonjë nga aktivitetet e tyre në Lindjen e Mesme.
“Ata janë perceptuar të pafajshëm dhe do të kthehen në jetën e tyre në Gjermani,” thotë një analist nga Berlini për Al Jazeeran.
Turqia ka thënë se ditët e ardhshme do të dërgojë në vend-origjinë disa luftëtarë nga Irlanda, Danimarkë dhe Franca.
Ndërsa në Britani, policia tha se kishin arrestuar një burrë 26-vjeçar në aeroportin Heathrow në Londër me dyshimin për vepra terrorizmi të lidhura me Sirinë. Ai kishte mbërritur nga Turqia por nuk ishte e qartë nëse ai ishte militant i deportuar nga Turqia.
Turqia thotë se ka kapur qindra luftëtarë në veri-lindje të Sirisë që prej fillimit të një operacioni ndërkufitar më 9 tetor. Me nisjen e aksionit, shteti turk ka prishur kalkulimet kurde për krijimin e një shteti të tyre ku do të përfitonin nga rajoni ndërkufitar Turqi-Siri.
Kujtojmë se kurdët kanë bashkëpunuar ngushtë me SHBA-të për të bllokuar militantët e IS-it në burgje, por që kjo e fundit nuk ka pranuar të gjykojë asnjërin prej tyre, duke i hapur rrugën Turqisë për t’i kthyer në origjinë. /tesheshi.com/
