Nr.2 i qeverisë turke paralajmëroi të hënën për një “katastrofë të madhe”, nëse Shtetet e Bashkuara do t’a njohin Jeruzalemin si kryeqytet izraelit, pavarësisht paralajmërimeve nga bota arabe.
“Nëse ndryshohet statusi aktual i Jerusalemit dhe merren masa tjera, kjo do të ishte një katastrofë e madhe”, tha zëvendëskryeministri turk, Bekir Bozdag gjatë konferencës televizive për shtyp.
“Kjo të shkatërronte plotësisht procesin e brishtë të paqes në rajon dhe do të çonte në konflikte të reja, polemika të reja dhe trazira”, tha Bozdag.
Statusi i Jerusalemit është një nga çështjet më të diskutueshme të një konflikti të gjatë izraelito-palestinez.
Presidenti i SHBA, Donald Trump këtë javë po përballet me vendimin nëse do ta njohë Jerusalemin si kryeqytet izraelit, veprim ky i cili do të devijonte nga kursi i presidentëve të mëparshëm të SHBA-së, të cilët kanë këmbëngulur që statusi i Jerusalemit duhet të vendoset në negociata, dhe do të provokonte reagime nga Autoriteti Palestinez dhe me siguri do të nxiste zemërimin edhe të botës arabe.
Presidenti turk, Recep Tayyip Erdogan, një avokat i madh i objektivave palestineze, shpesh e ka kritikuar Izraelin për veprimet e tij mbi Bregun Perëndimor dhe Rripin e Gazës, pavarësisht një marrëveshjeje të vitit 2016, pas një ndërprerjeje shumëvjeçare të lidhjeve mes dy vendeve, për shkak të një sulmi vdekjeprurës izraelit në një anije me aktivistë, i cili po lundronte në drejtim të Rripit të Gazës.
Bozdag, i cili është gjithashtu një zëdhënës i qeverisë, tha të hënën se hapi i SHBA-së drejt njohjes së Jerusalemit si kryeqytetin izraelit “nuk do të t’i sjellë dobi as Izraelit, as rajonit”.
“Kjo nuk do të sjellë përfitime për askënd. Në vend që të hapë një derë të re, ajo do ta çonte rajonin në një katastrofë të re”, tha ai, njofton AFP. /tesheshi.com/
