Zëvendëskryeministri turk, Numan Kurtulmush, ka përsëritur në një intervistë kundërshtimin e vendit të tij për një ndarje të Sirisë, duke vënë në dukje se fuqitë e mëdha janë në kërkim të një marrëveshjeje të re Sykes-Picot.
“Çfarë po ngjet është një marrëveshje e re Sykes-Picot,” ka deklaruar Numan Kurtulmush për të përditshmen në arabisht Ashark El Avsat. Me çka ai i referohet situatës së fundit në Siri dhe marrëveshjes së fshehtë pas Luftës së Parë Botërore mes Britanisë dhe Francës për ndarjen e zonave të influencës në Lindjen e Mesme.
“Fokusi kryesor i ca [fuqive] është t’i ndajnë vendet islame sipas linjave sektare dhe etnike, në përpjekje për të krijuar më shumë probleme mes grupeve etnike,” ka thënë mes të tjerash në intervistë zëvendëskryeministri turk. Po kërkohet të imponohet një fazë e re, që synon ndarjen e disa vendeve në rajon.
Palë të caktuara, sipas tij, po flasin tani për ndarjen e Sirisë në tre entitete më vete. “Ama fakti është se Siria mund të ndahet në 30 a 40 pjesë të ndryshme,” është shprehur ai.
“Vëmendja jonë kryesore është te mbrojtja e Sirisë si një shtet i unifikuar.” “Ne duhet të ruajmë integritetin territorial të Sirisë,” janë fjalët e zyrtarit të lartë turk në intervistë. /tesheshi.com/
