Ankaraja zyrtare kritikoi të dielën programin e qeverisë së re austriake të së djathtës dhe të djathtës ekstreme, e cila kundërshton fuqishëm hyrjen turke në Bashkimin Evropian.
“Ajo deklaratë e shkurtër pa ndonjë bazë në programin e qeverisë së re austriake, për fat të keq afirmon frikën e një orientimi politik, të bazuar në diskriminim dhe margjinalizim”, tha ministria e jashtme turke në një deklaratë.
“Nëse ky program realizohet, Austria mund të humbasë miqësinë turke dhe të provokojë reagimet që meriton”, thuhet më tutje në deklaratë.
Ministri turk i Çështjeve Evropiane, Omer Celik, vlerësoi se qeveria e re austriake filloi të shkatërrojë vlerat themelore demokratike. Në një seri të postimeve në Twitter, ai tha se kryeministri i ardhshëm konservator austriak Sebastian Kurz është më radikal sesa e djathta ekstreme.
Celik gjithashtu kritikoi BE-në për mos dënimin e programit të atij koalicioni.
“Injorimi i qasjeve raciste të programit të qeverisë austriake, do të thotë shfaqje e dobësisë”, shtoi ai.
Negociatat mbi pranimin e Turqisë në BE janë në pikën e vdekur që nga dështimi i grusht-shtetit në korrik të vitit 2016 dhe një valë represioni që u pasua në Turqi. Austria dëshiron një përfundim formal të negociatave, por disa vende kyçe të BE-së po i rezistojnë kësaj, veçanërisht Gjermania.
FPO-ja austriake e ekstremit të djathtë ka hyrë në një qeveri të re koalicioni, të formuar të shtunën, së cilës i janë caktuar portofoli i politikës së jashtme dhe mbrojtjes. /tesheshi.com/
