Një raport i një qendre kërkimore turke vuri në pah se Turqia kërkon që në vitin 2018 të tërheqë 1.5 për qind të të gjithë studentëve nga bota që duan të studiojnë jashtë, një shifër e barabartë me 100.000 studentë.
Raporti bën të ditur se numri i studentëve që studionin jashtë në vitet 1970 ishte 800.000, por kjo shifër ka njohur rritje të madhe, duke arritur në 4.5 milionë. Gjithnjë sipas raportit, numri i studentëve ndërkombëtarë pritet të shkojë në 8 milionë.
I njëjti raport thekson se numri i studentëve që vijnë nga jashtë për të ndjekur shkollën në Turqi ka vajtur në rreth 50.000 që prej fillimit të viteve 2000. Sipas informacionit të dhënë prej tij, 48.183 studentë të huaj i ndoqën studimet në Turqi gjatë vitit akademik 2013-2014, diku te 0.9 për qind e tërë studentëve të huaj në botë. Me nisjen e Planit të dhjetë të Zhvillimit, Turqia shpreson ta çojë në 100.000 numrin e studentëve të huaj. Raporti thotë se, “Numri i studentëve, i rritur në vitet e fundit falë bursave të dhëna nga Turqia, do të rritet me të njëjtën shpejtësi në periudhat vijuese.”
80 për qind e studentëve të huaj në Turqi ndjekin universitetet shtetërore, e 20 për qind e tyre u regjistruan në universitetet private në vitin e shkuar akademik. Universitetet në Stamboll, Ankara, Izmir, Konja dhe Erzurum janë më të pëlqyer për 60 për qind të studentëve të huaj.
Turqia kërkon të bëhet një qendër globale shkollimi, e për këtë e ka shtuar shumën e bursave ndërkombëtare. 13.000 studentë të huaj të regjistruar aktualisht në universitetet turke janë financuar nga programet arsimore të qeverisë. Në vitin 2014 u ndanë 203.9 milionë lira turke, diku te 96 milionë dollarë, për programet e bursave të qeverisë, duke shënuar një rekord të ri. Për vitin e ardhshëm akademik ka 90.000 aplikime nga 176 vende, gjë që përbën shifrën më të lartë deri më sot, krahasuar me 56.000 aplikime në 2013-n dhe 44.000 aplikime në 2012-n.
Të dhënat e Këshillit të Arsimit të Lartë tregojnë se Turkmenistani ka numrin më të madh të studentëve të huaj në Turqi, pasuar nga Azerbajxhani dhe Irani. Për shkak të vëmendjes së shtuar të qeverisë turke ndaj kontinentit afrikan, ka një rritje dhe të numrit të studentëve që vijnë nga atje. /tesheshi.com/
